نیوزی لینڈ دی فضاءاللہ اکبر دی آواز نال گونج اٹھی، نماز جمعہ دے اجتماع اچ وزیراعظم جیسنڈراآرڈرن ہنگلے پارک اچ موجود

کرائسٹ چرچ۔ 22 مارچ (اے پی پی) نیوزی لینڈ دیاں فضائیں جمعے دے ڈینھ اللہ اکبر دی آواز نال گونج اٹھیاں جڈاںجمعہ دی نماز کیتے آذان ڈتی گئی ۔ مسجد النور سمیت نیوزی لینڈدیاں ساریاں مسیتاں اچ نماز جمعہ اچ آئمہ کرام اسلام دی عظمت ، سانحہ کرائسٹ چرچ دے شہیداں دے درجات دی بلندی، امت مسلمہ دے اتحاد تے عالمی امن تے بھرپی کیتے خصوصی دعائیں منگیاں۔ نیوزی لینڈ دی وزیراعظم گزریل ڈینھاں اعلان کیتا ہئی جو مسلماناں نال یکجہتی کیتے سرکاری ریڈیو اتے ٹیلی وژن تے جمعے کوں اذان نشر کیتی ویسی اسلام نال محبت دے انہاں دے ایں جذبے دی پوری دنیا اچ تعریف کیتی گئی اے کرائسٹ چرچ دی مسجد النور اچ نماز جمعہدے موقع تے وزیراعظم جیسنڈرا آرڈرن ہزاراں شہریاں دے رلے باہر ہنگلے پارک اچ موجود ہن ایں موقع تے انہاں اپنڑے مختصر خطاب اچ آکھیے جو اساں تساڈے نال ہوں مسلمان مکمل تحفظ دے نال اپنڑی عبادت کرن۔ نماز جمعہ دے بعد نیوزی لینڈ دے ہزاراں شہریاں سانحہ کرائسٹ چرچ دے شہیداں نال اظہار یکجہتی کیتے ڈو منٹ دی چپ کیتی ۔تریمتاں مسلماناں دے نال یکجہتی دے اظہار دے طورتے سکارف پاتے ۔ مسجد النور دے امام اپنڑے خطاب جیں کوں نیوزی لینڈ اچ براہ راست نشر کیتا گیا جیں اچ آکھیا گے جو سانحہ تے اگراساں ڈکھی ہوں مگر زندہ تے متحد ہوں کوئی وی اساڈیاں صفاں کوں تروڑ نئی سگدا ۔