وزیراعظم دے معاون خصوصی سمندر پار پاکستانیز سید ذوالفقار بخاری دی ”اے پی پی“ نال گالھ مہاڑ

اسلام آباد ۔ 11 مارچ (اے پی پی) حکومت ای او بی آئی پنشنرز دی پنشن 15 ہزار روپے تئیں گھن ویسی ،جیندے سانگے اقدامات کیتے ویندے پن۔ ایہ گالھ وزیراعظم دے معاون خصوصی سمندر پار پاکستانیز سید ذوالفقار بخاری ”اے پی پی“ نال گالھ بات کریندے ہوئیں آکھی۔ انہاں آکھیا جو انہاں دی وزارت ماتحت اداریاں وچال لڑائی اتے مسئلیاں تے قابو سانگے مختلف اقدامات کریندی پئی ہے۔ ای او بی آئی دے خرچ تے قابو کرنڑ اتے فنڈز کوں مناسب جاءتے استعمال کرنڑ سانگے وی حکمت عملی بنڑائی ویندی پئی ہے۔ انہاں ڈسائے جو آندے کجھ مہیناں اچ اداریاں اچ مالی کرپشن روکنڑ اتے شفافیت سانگے اہم تبدیلیاں عمل اچ لاتیاں ویسن۔ معاون خصوصی آکھیے جو عہدہ سانبھنڑ دے فوری بعد انہاں وزیراعظم توں ای او بی آئی پنشنرز دی پنشن اچ ودھارے سانگے درخواست کیتی جیرھا جو اوں ویلھا صرف 5250 روپے گھندے پئے ہن ،جیندے بعد انہاں دی پنشن اچ 20 فیصد ودھارا کیتا گئے۔ انہاں ماضی اچ ای او بی آئی سربراہاں ولوں کرپشن اتے اختیارات دے ناجائز استعمال دے حوالہ نال وائٹ پیپر جاری کرنڑ دا وی اعلان کیتے۔