اسلام آباد ۔ 11 مارچ (اے پی پی) وزیراعظم عمران خان تیل تے گیس گولنڑسانگے ایں شعبہ نال وابسطہ مقامی کمپنیاں کوں لبھنڑ دے سلسلے اچ کوششاں تکھے کرنڑ دی ہدایت کیتی ہے جڈاں جو پاکستان اچ موجود تیل اتے گیس دے ذخائر گولنڑ سانگے معروف غیر ملکی کمپنیاں کوں ترغیب ڈیونڑ کیتے باہرلے ملکاں اچ روڈ شوز کراونڑ دا فیصلہ کیتا گئے ۔ وزیراعظم سنوار کوں پٹرولیم دے شعبہ توں متعلق معاملات بارے اہم اجلاس دی صدارت کر یندے پئے ہن۔ اجلاس اچ وزیر خزانہ اسد عمر، وزیر پٹرولیم غلام سرور خان، معاون خصوصی افتخار درانی، سیکریٹری پٹرولیم اتے پٹرولیم ڈویژن دے اعلیٰ افسراں شرکت کیتی۔ اجلاس اچ ملک اچ تیل اتے گیس دے ذخائر گولنڑ سانگے موجودہ قوانین اتے انتظامی اصلاحات تے غور کیتا گیا۔ وزیراعظم تیل تے گیس دے شعبہ نال وابستہ مقامی کمپنیاں کوں تیل گولنڑ دے سلسلے اچ کوششاں تکھے کرنڑ دی ہدایت کیتی۔ انہاں پٹرولیم ڈویژن کوں تیل تے گیس دے ذخائر گولنڑ آلیاں غیر ملکی کمپنیاں کوں ہر ممکنہ سہولت ڈیونڑ دی وی ہدایت کیتی۔ وزیراعظم ہدایت کیتی جو وزارت توں منظوریاں دے عمل کوں گھٹ توں گھٹ جڈاں جو غیر ضروری دیراتے فیتے کٹنڑ دی روایت مکاونڑ سانگے سارے عمل کوں ڈیجیٹل کرنڑ دے نال نال ہر ضروری منظوری سانگے ہک مخصوص میعاد اچ اینکوں مکمل کرنڑ یقینی بنڑایا ونجے۔ وزیراعظم ہدایت کیتی جو تیل تے گیس گولنڑ سانگے نویں قوانین وختی مشترکہ مفادات دی کونسل اچ پیش کیتے ونجنڑ ،تاں جو ایں کوں حتمی شکل ڈتی ونج جا سگے ۔ اجلاس اچ گیس دی چوری اتے ضیان روکنڑ سانگے سوئی ناردرن اتے سوئی سدرن دے لائحہ عمل دا جائزہ گھدا گیا۔ وزیراعظم آکھیا جو قدرت پاکستان کوں بئے ذخائر دے نال نال ساتھ تیل تے گیس دے وی مناسب ذخائر نال نوازے ،جینکوں گولنڑنال اتے انہاں تے کم کر تے ملکی ضرورتاں بہوں حد تئیں پوری کیتیاں ونج جا سگدیاں ہن ۔انہاں آکھیے جو بدقسمتی نال ماضی اچ ملک اچ موجود تیل تے گیس دے ذخائر گولنڑ تے توجہ ڈیونڑ دی بجائے مہنگی امپورٹ کوں ترجیح ڈتی گئی ،جیندی وجہ نال نہ صرف صنعتی صارفین متاثر تھئے بلکہ عام عوام تے مہنگائی دا بھاراچ ودھارا تھیا۔
