بیجنگ ۔ 20 مارچ (اے پی پی) وزیر خارجہ شاہ محمود قریشی آکھیے جوسی پیک توں متعلق سیاسی جماعتاں دا فورم ہک بئے نال مشورے کرنڑ اتے منصوبہ سانگے چنگاں ماحول ڈیونڑ دے حوالہ نال اساڈے سانجھے عزم تے عمل سانگے مدد کریسی، ایندے علاوہ فورم نال ڈوہائیں ملکاں وچال ویلھا دی ہر آزمائش اچ ہک بئے کوں تعاون نال تعلقات بئے پکے تھیسن۔ بدھ کوں دفتر خارجہ دے ترجمان ڈسایا جووزیر خارجہ ایہ گالھ گزریل ڈینھ بیجنگ اچ سی پیک توں متعلق سیاسی جماعتاں دے فورم نال خطاب کریندے ہوئیں آکھی ۔ فورم دا اہتمام سی پی سی مرکزی کمیٹی دے بین الاقوامی شعبہ ولوں کیتا گیا۔ ڈپٹی سپیکر قومی اسمبلی قاسم خان سوری، سینیٹ دی قائمہ کمیٹی خارجہ امور دے چیئرمین سینیٹر مشاہد حسین سیّد اتے سینیٹ دی سی پیک کمیٹی دی چئیرپرسن سینیٹر شیری رحمان اپنڑیں اپنڑیں پارٹی دے وفود دی قیادت کیتی ۔ گورنر بلوچستان امان اللہ خان،، اے این پی، این پی، جے یو آئی (ایف)، بی این پی، پی پی پی، پی ٹی آئی اتے پختونخوا ملی عوامی پارٹی دے نمائنداں سمیت بلوچستان اتے کے پی کے دی سیاسی جماعتاں دے وفود دی سانجھی قیادت کر یندے پئے ہن۔ فورم اچ چین توںایگزم بینک، ایس او ایز، تھنک ٹینکس، آئی ڈی سی پی سی، این ڈی آر سی اتے میڈیا نمائندے شریک تھئے۔ فورم دے چھیکڑ اچ سارے سٹیک ہولڈرز دے مشورے نال بیجنگ اعلامیہ جاری کیتا گیا۔
