بھارت پاکستان کوں سفارتی طور تے کلہا کریندے کریندے آپ گندا تھی گئے، مودی دے کوڑ بھارت کوں کھا لتھین،وفاقی وزیر پٹرولیم غلام سرور خان دی صحافیاں نال گالھ مہاڑ
اسلام آباد ۔ یکم مارچ(اے پی پی) وفاقی وزیر پٹرولیم غلام سرور خان آکھیے جو پاکستان اتے بئے رکن ملکاں کوں اعتماد اچ گھدے بغیر سشما سوراج کوں او آئی سی اجلاس اچ سڈنڑ افسوسناک اے،بھارت پاکستان کوں سفارتی طور تے کلہا کریندے کریندے آپ گندا تھی گئے، مودی دے کوڑ بھارت کوں کھا لتھین۔ اے گالھ وفاقی وزیر پٹرولیم اتے قدرتی وسائل غلام سرور خان اسلام آباد اچ میڈیا نال الویندے آکھی۔ انہاں آکھیے جو وزیراعظم عمران خان دابھارتی پائلٹ کوں چھوڑن دا حکم خطے اچ قیام امن کیتے ہک وڈا قدم اے،پاکستان دے جذبہ خیر سگالی ثابت کیتے جو پاکستان خطے اچ امن چاہندے اتے بھارتی اشتعال انگیزی دے باوجود بہوں صبر اتے برداشت دا مظاہرہ امن دوستی دی مثال اے تاں جو کشیدگی گھٹے۔انہاں آکھیے جو ایں امن دے سنیہے تے ناصرف خطے اچ امن اتے استحکام آسی بھل پورے جگ ایکوں پاکستان دی اخلاقی جیت قرار ڈیندے ہوئے تعریف کیتی اے اتے بھارتی آپ وی ایندے معترف تھی گین۔انہاں آکھیے جو پاکستان سفارتی طور تے مسلہ کشمیر اتے بھارت نال تنازعے دے پچھو اپنڑا موقف اگونہا کرنڑ اچ کامیاب تھی گئے جیندے نال مسلہ کشمیردی کئی دھاکیاں بعد راہ سوکھی تھیندی ڈسدی پئی اے۔
