لاہور۔9 مارچ(اے پی پی ) وفاقی وزیر اطلاعات و نشریات چوہدری فواد حسین آکھیے جو پاکستان بھارتی کرکٹ ٹیم ولوں آرمی کیپ پاونڑ دا معاملہ آئی سی سی اچ گھن ونجنڑ دا فیصلہ کیتے،جیکر بھارتی ٹیم کھیڈ اچ سیاست گھن آ سگدی اے تاں ول پاکستانی ٹیم وی کشمیر اچ تھیونڑ آلے مظالم کوں نشابر کر سگدی اے،آئی سی سی فوجی کیپ پاونڑ تے بھارتی ٹیم تے پابندی لاوے،بھارتی وزیر اعظم نریندر مودی کلچر‘ فلم‘کھیڈسودھے معاشرہ دے ہر طبقہ کوں جنگ اچ دھکا ڈے ڈتے،پلوامہ واقعہ دے بعد بھارتی الزامات اوندے اپنڑے منہ تے کالک ثابت تھین، پاکستان دا امن دا بیانیہ مغربی ممالک سودھے مسلم ملکاں وی منیے،ہنڑ معاملہ دی شدت اچ بہوں کمی تھی گئی اے۔ اے گالھ وفاقی وزیر اطلاعات و نشریات چوہدری فواد حسین لاہور اچ میڈیا نال گالھ مہاڑکریندے آکھی اے۔انہاں آکھیے جو پاکستانی سفےر نئی دہلی پج چکین،بھارتی سفیر وی پاکستان آ گئے،ایئرپورٹس کھل گئن اتے معاملہ بہوں وڈی حد تئیں ٹھڈا تھی چکیے۔انہاں ایں موقع تے سوشل ویلفیئر کمپلیکس دا دورہ وی کیتا جتھاں انہاں دے نال صوبائی وزیر سوشل ویلفیئر اجمل چیمہ‘ وزیر اعلیٰ دے مشیر محمد اکرم چوہدری وی موجود ہن۔ انہاں آکھیا جو وزیراعظم عمران خان ،نوازشریف کوں چنگان علاج ڈیونڑ دی ہدایت کیتی اے بھل مسلم لیگ (ن)دا ہک طبقہ نواز شریف دی صحت تے سیاست کریندا پئے، نواز شریف دے کجھ مخالفین اتے سنگتی ساتھی وی انہاں دی بیماری کوں کیش کراونڑ چاہندن،جیکر بلاول نوازشریف نال ملدن تاں ایندے اچ کوئی ہرج کائنی۔ انہاں آکھیا جو کالعدم تنظیماں دے خلاف کارروائیاں نال بھارت دا کوئی لاھنڑا ڈیونڑا نئیں ،اے کارروائی حکومت نیشنل ایکشن پلان اتے نیشنل سکیورٹی کونسل دے فیصلیاں تے عملدرآمد سانگے کریندی پئی اے۔ انہان آکھیا جو آندے ڈینہاں اچ معاشی صورتحال بئی چنگی تھی ویسی، غریباں کوں ہر سطح تے سوکھ ملسی۔انہاں زور دتا جو مخیر حضرات اپنڑے عطیات ڈیونڑ کیتے احتیاط کرن اتے چھان پھٹک توں بعد ڈیون۔
