اسلام آباد ۔ یکم مارچ(اے پی پی) وفاقی وزیر اطلاعات و نشریات فواد حسین چوہدری مسلح فوج کوں خراج تحسین پیش کریندے ہوئیں آکھیے جو پاکستان دی مسلح فوج پاکستان دا سر فخر نال اچا کر ڈتے ،تے پوری قوم سیسہ پلائی ہوئی دیوار وانگوں پاک فوج دے پچھوں کھڑی اے ،شہیداں دیاں قربانیاں دی وجہ توں اساکوں آزادی دی نعمت ملی اے ،بھارت اندرلے معاملات دا ملبہ پاکستان تے نہ پاوے،انتہا پسندی دے خلاف ہک مٹھ تھیونڑ دی ضرورت اے ۔جمعے کوں پارلیمان دے سانجھے اجلاس نال خطاب کریندے ہوئیں وفاقی وزیر اطلاعات آکھیا جو خواجہ آصف ایوان اچ کجھ گالھیں کیتن لیکن اتفاق رائے دا جیرھا ماحول اے اینکوں خراب نئی کرنڑ چاہندے۔انہاں آکھیا جیویں منو بھائی آکھیا ہئی جو جنگ کہیں دی سکی کائنی ہوندی ایندے ہرپاسے تباہی تھیندی تے ،انہاں آکھیا میں ساریں دیاں گالھیں سنڑین پورے ایوان دا ایں گال تے اتفاق اے جو پاکستان جنگ نی چاہندا لیکن سوال اے ہے جو کیا بھارت اچ وی اتفاق رائے موجود اے ۔ایندا جواب نفی اے اے۔ وفاقی وزیر آکھیا جو پچھلے سال دسمبر توں خبراں آندیاں پن جو بھارت اچ الیکشن دے تناظر اچ وزیراعظم مودی جارحیت دا ماحول بنڑاونڑ چاہندے ،پاکستان کوں ایندا پتہ ہئی وزیر خارجہ تے وزارت خارجہ ایں سلسلے اچ گروپ پی فائیو دے سفیراں کوں وختی ڈسا ڈتا ہئی تے اینکوں درخواست کیتی ہئی جو بھارت کوں ایں طرح دے اداریں توں باز رکھن ، 14 فروری کوں پلوامہ دا واقعہ تھیا ایں تے اساکوں افسو س تے ایندے تے جانی ضیان تھے 1947ءدے بعد بھارت دا ساریں توں وڈا ضیان تے ایندے تے بھارت دی کاوڑ فطری ہئی لیکن ایندا ملبہ پاکستان تے ڈھاونڑ درست کائنی ،بھارت خود بینی دی اشد ضرورت اے ، پلوامہ دے جیں علاقے اچ اے واقعہ تھے اتھاں بھارتی قابض فوجاں 100 بالاں کوں شہید کر ڈتے، اتھاں انسانی حقوق دیاں پامالیاں دے واقعات عام ہن بھارت کوں جائزہ گھننڑاں چاہیدے جو اینویں کیوں تھئے اتھاں دے واقعات دا ملبہ پاکستان تے نہ پاوے ۔ وفاقی وزیر آکھیا وزیراعظم عمران خان ایں صورت حال اچ عالمی مدبر (سٹیٹس مین) دا کردار ادا کیتے کل انہاں ایوان اچ اپوزیشن دا وی شکریہ ادا کیتے ، وزیراعظم دی قیادت اچ مشرق وسطیٰ اچ پاکستان دا کردار ابھر تے سامنڑے آگے ۔
