اسلام آباد ۔ 6 مارچ (اے پی پی) صدر مملکت ڈاکٹر عارف علوی نینگراں کوں جدید دور دے تقاضیں دے مطابق ڈیجیٹل کمیونیکیشن دے میدان اچ دستیاب موقع توں فائدہ چاونڑ تے نویں پاکستان دے مقاصد دے حصول کیتے سائنس تے ٹیکنالوجی دے شعبیں اچ اگی تے ودھنڑ تے زور ڈیندے ہوئیں آکھیے جو پاکستان سائنس دے شعبے اچ تکھے ترقی کریندا پئے ، جامعات تعلیمی نصاب کوں عالمی معیار دے مطابق بنڑاونڑ جڈاں جو اساکوں مختلف شعبہ جات اچ ٹیکنالوجی دے استعمال کوں مزید ودھاونڑ دی ضرورت اے ۔انہاں اے گال بدھ کوں اتھاں بحریہ یونیورسٹی اچ مواصلات، کمپیوٹنگ اتے ڈیجیٹل نظام بارے ڈو ڈینھ دی کانفرنس دی افتتاحی نشست نال خطاب کریندیں آکھی ۔ صدر ایں امر تے زور ڈتا جو جامعات تعلیمی نصاب کوں عالمی معیاردے مطابق بنڑاون تے جدید تقاضیں نال ہم آہنگ کرن ۔انہاں آکھیے ایں ضمن اچ نینگراں کوں آونڑ آلے وقت دیاں ضرورتاں دے مطابق تیار کیتا ویسی تاں جو او زندگی دے ہر شعبے اچ اپنڑاں مناسبت کردار ادا کر سگن ۔ صدر آکھیا انہاں1980ءدی دہائی دے اوائل توں کمپیوٹر استعمال کرنڑشروع کر ڈتے تے بعد اچ تنظیمی امور اچ رابطے کیتے سمارٹ فون کوں استعمال کریندے رہیے تے ایں طرح روزانہ دی زندگی اچ جدید ٹیکنالوجی دا استعمال انہاں دی ترجیح رہی۔ صدر ایں اہم موضوع تے کانفرنس دے کامیاب انعقاد تے بحریہ یونیورسٹی کوں مبارخ ڈیندے ہوئیں آکھیے جو سائنس تے ٹیکنالوجی، ڈیجیٹل سسٹمز اتے مواصلات دے شعبیں تے توجہ مرکوز کرنڑ وقت دا تقاضا اے۔ ایں ضمن اچ کانفرنس دا انعقاد خوش آئند اے جیں نال خاص طور تے نینگراں کوں سکھنڑ تے فائدہ چاونڑ دا موقع مل ویسی ۔
