پاک بحریہ اپنڑے سمندری زون اچ موجود بھارتی آبدوزلبھ تے اینکوں پاکستانی سمندری حدود اچ داخل تھیونڑ توں روک ڈتا ،پاکستان امن پسندی دا مظاہرہ کریندے ہوئیں بھارتی آبدوز کوں نشانہ کائنی بنڑایا ، ترجمان پاک بحریہ دا بیان

اسلام آباد ۔ 5 مارچ (اے پی پی) بھارت کوں سمندری محاذتے وی ناکامی دا سامنڑاں کرنڑاں پئے جڈاں پاک بحریہ اپنڑے سمندری زون اچ موجود بھارتی آبدوز کوں لبھ تے اینکوں پاکستانی سمندری حدود اچ داخل تھیونڑ توں روک ڈتا پاکستان امن پسندی دا مظاہرہ کریندے ہوئیں بھارتی آبدوز کوں نشانہ کائنی بنڑایا۔منگل کوں پاک بحریہ دے ترجمان اپنڑے ہک بیان اچ ڈسائے جو پاک بھریہ اعلیٰ پیشہ ورانہ مہارتاں دے نال ہر ویلھے تکڑے رہندے ہوئیں کامیابی نال بھارتی آبدوزکوں گول تے اینکوں پاکستان دی حد اچ داخل تھیونڑ توں روک ڈتے ۔ ترجمان دے مطابق پاک بحریہ بھارتی آبدوز دی اپنڑی موجودگی کوں خفیہ رکھنڑدی ہر کوشش کوں ناکام بنڑائے۔ یاد رہے جو نومبر 2016ءدے بعد اے ڈوجھا موقع اے جڈاں پاک بحریہ بھارتی آبدوزدا سراغ لاتے۔ ترجمان ڈسائے جو پا ک بحریہ دا جدید ٹیکنالوجی نال لیس بھارتی آبدوزدا سراغ لاونڑ بھارتی بحریہ دی ناکامی اے ۔ ترجمان آکھیے جو امن قائم رکھنڑ دی حکومتی پالیسی کوں سامنڑے رکھیندے ہوئیں بھارتی آبدوز کوں نشانہ کائنی بنڑایا گیا جیرھا جو پاکستان دی امن پسندی دی مثال اے ۔ ایں واقعے توں سبق حاصل کریندے ہوئیں بھارت کوں وی امن دا سوچنڑاں چاہیدے ۔ ترجمان پاک بحریہ آکھیے جو اے اہم کارنامہ پاکستان نیوی دی اعلیٰ صلاحیتاں دامنہ بولیندا ثبوت اے ۔انہاں آکھیے جو پاک بحریہ ہر ویلھے کہیں وی جارحیت دا منہ بھن جواب ڈیونڑ دی ودھ ساری صلاحیت رکھیندی اے ۔