اسلام آباد۔14مارچ(اے پی پی)چین کالعدم تنظیم ”جیش محمد“دے سربراہ مولانا مسعود اظہر کوں دہشتگرد قرار دیونڑ اتے عالمی پابندیاں لاونڑ دی ہک بئی کوشش ناکام بنڑا ڈتی اے۔امریکا، برطانیہ اتے فرانس رل تے بھارت دی درخواست تے اقوام متحدہ دی سلامتی کونسل دی کمیٹی اچ مولانا مسعود اظہرتے پابندیاں دی قراردادجمع کرائی ہئی جیہڑی چین تکنیکی بنیاداں تے ناکام بنڑا ڈتی۔ اے ترجھی واری اے جو بھارت دے حواری ملکاں کوںچین دے موقف پاروں سلامتی کونسل اچ ناکامی دا منہ ڈیکھنڑا پئے۔امریکا ،برطانیہ اتے فرانس اقوام متحدہ دی سلامتی کونسل دی کمیٹی کوں 27 فروری کوںقرارداد جمع کرائی ہئی جیندے اچ مولانا مسعود اظہرتے ہتھیاراں دی فراہمی روکنڑ اتے سفری پابندی دے نال نال سارے اثاثے منجمدکرتے اقوام متحدہ دی دہشتگرداں دی فہراست اچ پاونڑدا مطالبہ کیتا گیا۔جواب اچ چین اے قرارداد روکیندے ہوئیں تکنیکی وجوہات اچ آکھیے جو ایں معاملے تے اقوام متحدہ دی سلامتی کونسل اتے اوندے ذیلی اداریاں دے قواعد و ضوابط دے مطابق عملدرآمد یقینی بنڑیندے ہوئیں بحث کرنڑی چاہیدی اے اتے اے معاملہ مذاکرات نال حل تھیونڑا چاہیدے۔ڈوجھے پاسو معاملے تے وضاحت کریندے ہوئے چین دی وزارت خارجہ دے ترجمان بیجنگ اچ اپنڑی باقاعدہ پریس بریفنگ اچ آکھیے جوچین سیکیورٹی کونسل اچ اپنڑیاں ذمہ داریاں نبھیندا راہسی اتے بھرپور شرکت جاری رکھیسی،معاملے دا ذمہ دارانہ حل‘ صرف گالھ مہاڑ نال ہی ممکن اے،ایں سانگے اقوام سلامتی کونسل دے قواعدتے عملدآمد یقینی بنڑایا ونجے۔
