اسلام آباد۔14مارچ(اے پی پی)اقوام متحدی دی سلامتی کمیٹی اچ ہک بئی سفارتی ناکامی تے شدید مایوسی دا اظہار کریندے ہوئیں بھارت دی وزارت خارجہ دے ترجمان دوست ملکاں دی حمایت دا شکریہ ادا کیتے اتے آکھیے جواگلی واری کوشش ہوسی جو جگ اچ دہشتگردی داموجب بنڑن آلے عناصر دے خلاف کارروائی اتے انہاں کوں انصاف دے کٹہرے اچ گھن آونڑ کیتے پہلے توں ودھ موثر اقدامات کروں۔انہاںا ٓکھیے جو چین ولوں اینجھے فیصلے دی توقع نہ ہئی کیوں جو دہشتگردی دے خلاف خطے ہی نئیں پورے جگ دا ہکو موقف اے۔ اے رد عمل اوں ویلھے آئے جڈاں ناکافی شواہد اتے ثبوتاں دی بنیاد تے بھارت دی مولانا مسعود اظہر کوں اقوام متحدہ دی سلامتی کونسل دیاں ممنوعہ تنظیماں اتے افراددی فہرست اچ رلاونڑ کیتے امریکا،برطانیہ اتے فرانس دے مونڈھے تے رکھ تے بندوق چلاونڑ دی کوشش ناکام تھی گئی اے۔اے چوتھی واری ہئی جڈاں بھارت پٹھان کوت حملے توں بعد مولانا مسعود اظہر تے عالمی پابندیاں لواونڑ دی کوشش کیتی اے ۔ایں توں پہلے 2001 اچ سلامتی کونسل مسعود اظہر دی تنظیم جیشِ محمد کوں دہشت گرد تنظیم قرارڈے چکی اے جیندے بعد پاکستان وی 2002اچ جیش محمد کوں کالعدم قرار ڈتا ہا۔مولانا مسعود اظہر کوں اقوام متحدہ دی سلامتی کونسل دیاں ممنوعہ تنظیماں اتے افراددی فہرست اچ رلاونڑ کیتے کوشش 2009توں جاری اے،چین 2016 اتے 2017اچ وی سلامتی کونسل اچ اے کوشش ناکام بنڑا چکیے جو ایں بارے ناقابل تردید شواہدپیش کرنڑضروری ہین۔یاد راہوے جو اقوامِ متحدہ دی سلامتی کونسل 15 اراکین تے مشتمل اے جیندے اچ پنج مستقل ارکان امریکہ، برطانیہ، فرانس، روس اتے چین جڈاں جوڈاہ عارضی ارکان ہین۔عارضی اراکین ڈو سال کیتے اقوام متحدہ دی جنرل اسمبلی دے ذریعے چنڑیے ویندن۔ سلامتی کونسل دے کہیں وی فیصلے دی منظوری انہاں پنج ملکاں دی رضامندی نال تھیندی اے جیکر کوئی وی ہک ملک اعتراض کر ڈیوے تاں ایکوں”ویٹو“سمجھیا ویندے۔
