سینیٹ گھٹ عمر دی شادی تے پابندی سانگے ازدواج اطفال (ترمیمی) بل 2018ءدی منظوری ڈے ڈتی

اسلام آباد ۔ 29 اپریل (اے پی پی) سینٹ اچ پابندی ازدواج اطفال (ترمیمی) بل 2018ءدی منظوری ڈے ڈتی گئی۔ سنوار کوں سینٹ اجلاس اچ سینیٹر شیری رحمان پابندی ازدواج اطفال ایکٹ 1969ءاچ بئی تبدیلی دا بل پابندی ازدواج اطفال (ترمیمی) بل 2018ءقائمہ کمیٹی دی رپورٹ دی صورت اچ وختی زیر غور گھن آونڑ دی تحریک پیش کیتی۔ سینیٹر مولانا عبدالغفور حیدری بل دی مخالفت کیتی۔ انہاں آکھیا جو شادی سانگے بلوغت ضروری ہے۔ عمر دی حد مقرر نئیں کیتی ونج جا سگدی ۔ جماعت اسلامی دے سینیٹر مشتاق احمد خان وی بل دی مخالفت کیتی اتے آکھیا جو کمیٹی چیئر دی رولنگ دے باوجود میکوں اجلاس اچ نی سڈیا گیا اتے میڈا مرضی نئیں پچھی گئی۔ کمیٹی میکوں وی سنڑن چاہیدا ہا۔ سینیٹر مولانا عطاءالرحمان آکھیا جوا یہ اہم معاملہ ہے، بل کوں اسلامی نظریاتی کونسل کو ںبھیجیا ونجے۔ مولانا فیض محمد بل دی مخالفت کریندے ہوئیں آکھیا جو شریعت دے احکامات دی پابندی ضروری ہے۔ وزیر مملکت علی محمد خان آکھیا جو پاکستان اسلام دے ناں تے بنڑے، اساکوںاپنڑے بالاں دی حفاظت کرنڑ چاہیدی ہے۔ آئین اساکوں دین توں رہنمائی گھنڑ سانگے پابند کریندے۔ سینیٹر رضا ربانی آکھیا جو جڈاں میںچیئرمین سینیٹ ہم تاں سینیٹر سحر کامران ایہ بل پیش کیتا ہا جینکوں میں کونسل کوں بھجوا ڈتا ہا۔ اج تئیں اتھوں جواب نئیں آیا۔ بل پیش کرنڑ آلی سینیٹر ریٹائر تھی گئی ہن ، کونسل کوں بل بھیجنڑ نال ایہ کولڈ اسٹوریج اچ چلا ویسی۔ سندھ اچ وی ایجھا بل منظور تھی گئے،کہیں بندے چیلنج نئیں کیتا۔ ترکی، یو اے ای سمیت مختلف اسلامی ملکاںاچ شادی دی حدعمر مقرر ہے۔ وزیر مذہبی امور نور الحق قادری آکھیا جو اساکوںاسلامی تعلیمات دی روشنی اچ فیصلے کرنڑ پوسن ۔ قائد ایوان سینیٹر شبلی فراز آکھیا جو کمیٹی اچ بل تے تفصیلی بحث تھی گئی ہے۔ مذہبی مسئلیاں بارے اسلامی نظریاتی کونسل کوں اپنڑاں کردار ادا کرنڑ چاہیدے ۔ بل بارے اسلامی نظریاتی کونسل ولوں کوئی واضح رائے نئیں ڈتی۔ اسلامی جمہوریہ ہونڑ پاروں اساکوں اسلامی قوانین توں مدد تے رہنمائی گھنڑ چاہیدی ہے ۔ چیئرمین بل تے ایوان توں مشورہ گھدا۔ا کثریت بل دی منظوری ڈے ڈتی۔ جمعیت علمائے اسلام (ف) اتے جماعت اسلامی نال تعلق رکھنڑ آلے ارکاناں ایں موقع تے ایوان توں واک آﺅٹ کیتا۔