اسلام آباد ۔ 23 اپریل (اے پی پی) وزیر خارجہ شاہ محمود قریشی آکھیے جو معیشت دے سارے سیکٹرز اچ جاپانی تاجراں اتے کمپنیاں کوں پیشکش کیتی ہے جوا وہ پاکستان اچ خصوصی اقتصادی زونز اچ پر کشش مواقعاں توں فائدے گھنڑ۔دفتر خارجہ دے ترجمان مطابق شاہ محمود ایہ گالھ منگل کوں ٹوکیو اچ جاپان دے نائب وزیر اعظم اتے وزیر خزانہ تارو آسو نال ملاقات دوران گالھ مہاڑ کریندے ہوئیں آکھی۔وزیر خارجہ نائب وزیر اعظم کو ں وزیر اعظم عمران ولوںجاپانی حکومت اتے عوام سانگے نیک خواہشات دا پیغام ڈیندے ہوئیں جاپانی وزیر اعظم ایبے کوں دورہ پاکستان دی دعوت دا وی آکھیا ۔ ملاقات اچ ڈو طرفہ کثیر الجہتی تعلقات اتے ڈوہائیں ملکاں وچال مختلف شعبیں اچ تعاون ودھاونڑ سانگے گالھ مہاڑ کیتی گئی۔ایں موقع تے ڈوہائیں رہنماواں خطے اچ امن و امان دی موجودہ صورتحال تے وی گالھ مہاڑ کیتی۔ڈوہائیں رہنماواں خطے اچ امن و استحکام سانگے سانجھی کوششاں جاری رکھنڑ دے عزم دا اعادہ کیتا اتے ڈوطرفہ تعلقات دی موجودہ نوعیت تے اطمینان دا اظہار کیتا۔وزیر خارجہ شاہ محمود قریشی پاکستان دے ترقیاتی پارٹنر دی حیثیت نا ل جاپان دے کردار دی تعریف کریندے ہوئیں آکھیا جو پاکستان معیشت دے سارے سیکٹرز اچ جاپانی تاجراں کوں خوش آمدید کرنڑ سانگے تیار ہے۔جاپانی نائب وزیر اعظم آکھیا جو ڈوہائیں ملکاں وچال سانجھا تعاون کوں بیا ودھاونڑ سانگے ودھ سارے مواقع موجود ہن۔انہاں پاکستان دے نال تجارت اتے سرمایہ کاری اچ وددھارے دا تسلسل جاری رکھنڑ سانگے مکمل تعاون دا یقین ڈیوایا۔
