اسلام آباد ۔ 23 اپریل (اے پی پی) قومی اسمبلی اچ سود مکاونڑ سانگے مالیاتی قوانین اچ بئی ترمیم کرنڑ دا بل ” ربا کا خاتمہ بل 2019ء“ پیش کرڈتا گئے ۔ منگل کوں قومی اسمبلی اچ مولانا عبدالاکبر چترالی‘ عالیہ کامران‘ شاہدہ اختر علی‘ عبدالشکور ولوں سود مکاونڑ سانگے مالیاتی قوانین اچ بئی ترمیم کرنڑ دا بل پیش کیتا گیا۔ بل دے ہک محرک عبدالاکبر چترالی آکھیا جو پاکستان دے آئین مطابق ملک دے سارے قوانین قرآن تے سنت دے تابع ہوندن۔اسلام اچ بیع حلال اتے سود حرام ہے۔ اسلامی نظریاتی کونسل وی سود مکاونڑ دی سفارش کیتی ہے۔ مدینہ دی اسلامی ریاست بناونڑسانگے سود مکاونڑ پوسی ۔ وزیر قنون فروغ نسیم آکھیا جو ایں بارے کوئی بئی گالھ کائنی جو ربا حرام ہے‘ حکومت بل دی حمایت کریندی ہے۔ انہاں آکھیا جو بنکنگ دا جیرھا نظام چلدا پئے ،ایندے بارے آج کل وفاقی شریعت کورٹ اچ ایں حوالے نال کیس دی سماعت وی تھیندی پئی ہے۔ میڈا مشورہ ہے جو بل کوں کمیٹی اچ بھیجا ڈتا ونجے۔ مولانا عبدالاکبر چترالی آکھیا جو اگر بل اچ کوئی شہ گھٹ ہے تاں سوڈان اتے لیبیا دے بلز توں فائدے گھدے ونج جا سگدن۔ ایندے علاوہ بینک آف خیبر اچ وی 72 غیر سودی خدمات دی فراہمی شروع کیتی گئی ہے، انہاں توں وی مدد گھدی ونج جا سگدی ہے۔ ایوان بل پیش کرنڑ دی منظوری ڈتی ،جیندے بعد بل متعلقہ کمیٹی دے سپرد کرڈتا گئے۔
