مرکزی رویت ہلال کمیٹی دا مقصد اسلامی مہینے اتے مذہبی تہواراں کوں کٹھے مناونڑ اے، وفاقی وزیر مذہبی امور پیر نور الحق قادری

اسلام آباد ۔ 26 اپریل (اے پی پی) وفاقی وزیر مذہبی امور پیر نور الحق قادری آکھیے جو رمضان المبارک ‘ عیدین اتے بئے مذہبی تہواراں کوں کٹھے یکجہتی نال مناونڑ کیتے مرکزی رویت ہلال کمیٹی بنڑائی گئی ہئی، کمیٹی دے موجودہ ارکان 2010ءتوں کم کریندے پین،ہر رکن دی مدت ترائے سال اے جیندے اچ توسیع کیتی ویندی اے۔ قومی اسمبلی اچ وقفہ سوالات دے دوران ولدا ڈیندے ہوئے وفاقی وزیر مذہبی امور پیر نور الحق قادری آکھیا جومرکزی رویت ہلال کمیٹی 1974ءاچ بنڑی ہئی بھل بدقسمتی نال ذاتی یا نجی کمیٹیاں ہمیشہ مرکزی کمیٹی دے فیصلے توں اختلاف کیتے قومی یکجہتی اچ دراڑ سٹی اے، موجودہ حکومت زونل‘ صوبائی کمیٹیاں کوں فعال کرتے قانون سازی کرنڑ چاہندی اے جیہڑی صوبیاں دے بغیر ممکن کائنی۔ سندھ اسمبلی توں قرارداد آچکی اے، باقی اسمبلیاں توں قرارداداں آسن تاں جو سارے مسالک‘ متعلقہ محکماں اتے وزارت مذہبی امور دی نمائندگی ہووے،کوشش ہوسی جو میڈیا کون وی رلایا ونجے ایندے نال ذاتی/ نجی کمیٹیاں دے اعلان کوںروکنڑ اچ مدد ملسی۔