کوئٹہ ۔21اپریل (اے پی پی)وزیراعظم عمران خان آکھیے جو ملک کوں بیدردی نال لٹیا گئے،اے ویلھا اوکھا ضروراے بھل ساکوں ایندا سامنڑا کرنڑے،ایکو سمجھنڑ دی لوڑھ اے جو ملک کوں کیں لٹیے،جڈاں میں پنج سال بعد چھور تے ویساں تاں تساں سمجھ سگو جو میں ملک کوں چنگے حال اچ چھوڑی وینداں،اساں قرض گھٹیسوں،ماضی دیاں حکومتاں جیویں ملک کوں قرضو کالا کیتے اتے جیباں بھرین ایویں تاں کوئی دشمن وی نئیں کریندا،وفاق پینتالی سو ارب روپے دے ٹیکس کٹھے کریندے جیندے اچوں ڈوہزار ارب قرض ادائیگی ،پنجوی سو ارب روپے صوبیاں اتے ستارحاں سو ارب روپے سیکیورٹی اچ لگیے ویندن ،وفاق تاں اپنڑا حساب کتاب ست سو ارب روپے دے نقصان توں شروع کریندے۔اے گالھ وزیر اعظم عمران خان کوئٹہ اچ نیا پاکستان ہاﺅسنگ سکیم دے منصوبے دا سنگ بنیادرکھنڑدی تقریب نال خطاب کریندے ا ٓکھی۔انہاں نینگراں کوں مخاطب کریندے آکھیے جیکر قرض دی قسطاں اچ ڈو ہزار ارب روپے نہ ڈیونڑے پوون تاں سارے مسلے ہی مک ویسن،قرض لہہ ویسی اتے ملک ترقی کر ویسی۔ انہاںا ٓکھیے جو ملک کجھ ویلھے کیتے اوکھ اچ اے،بیا وی اوکھ آسی،بھل اے ویلھا تیکھے چنگاں تھیونڑ آلا اے،جیکر فیکٹری اچ ڈاکو کوں بلھا ڈتا ونجے تاں او نئیں چل سگدی،جیکر ملک اچ واریاں بدل بدل تے ڈاکو آونجن تاں او کیویں چلسی،ملک کوں مصیبت اچ سٹنڑ آلیاں کوں سزا ضرور ملسی ،ایندے اچ کتنی ہی دیر کیوں نہ تھی ونجے تاں جو اگو تے مستقبل اچ کوئی وی حکمران ملک لٹنڑتوں ڈرن۔ وزیراعظم آکھیے جو اے ڈریے ہوئن جو جتنا جلدی تھیوے عمران خان دی حکومت ڈھواوں اتے جیل ونجنر توں بچوں،مولانا فضل الرحمان دی حالت اوں ہریے ہوئے کھیڈاڑی دی اے جیہڑاہار دے ڈر توں وکٹاں چاءتے بھج ویندا ہا جو نہ کھیڈسوں تے نہ کھیڈنڑڈیسوں۔
