اسلام آباد ۔ 4 اپریل (اے پی پی) وزیراعظم عمران خان جاری مہینے نواں پاکستان ہاﺅسنگ منصوبے دے پہلے مرحلے اچ بلوچستان اتے اسلام آباد اچ ہک لکھ 29 ہزار اپارٹمنٹس دی بنیاد رکھیسن،پہلے مرحلے اچ کوئٹہ اتے گوادر اچ ہک لکھ10 ہزار، اسلام آباد دے 4 مختلف منصوبیں تحت 19 ہزار اپارٹمنٹس بنڑائے ویسن ۔ وزیراعظم آفس ولوں جاری پریس ریلیز مطابق ایں گالھ دا فیصلہ نواں پاکستان ہاﺅسنگ منصوبیں تے پیش رفت دے جائزہ اجلاس دوران کیتاگیا۔ اجلاس دوران وزیراعظم کو ں ڈسایا گیا جو ایں پروگرام تحت بلوچستان دے ڈو شہراں کوئٹہ اتے گوادر اچ ہک لکھ اچ ہزار جڈاں جو اسلام آباد دے مختلف علاقیاں اچ چار مختلف منصوبیں اچ 19 ہزار اپارٹمنٹس بنڑائے ویسن۔ سیکرٹری ہاﺅسنگ ڈاکٹر عمران زیب خان وزیراعظم کو ںڈسایا جو نواں پاکستان ہاﺅسنگ اتھارٹی بنڑاونڑ سانگے مسودہ قنون کابینہ دی لیجسلیٹیوکمیٹی کو بھجواڈتا گئے۔ انہاں ڈسایا جو وزارت ہاﺅسنگ حکومت بلوچستان دے نال کوئٹہ اچ وحدت کالونی اچ پنج ہزار، گوادر اچ 55 ہزار، فشر کالونی 54 ہزار اتے صوبے اچ بئی جئیں تے اپارٹمنٹس بنڑاونڑ سانگے مفاہمت دی یادداشت تے دستخط کریسی۔ آزاد جموں و کشمیر اچ ترائے ہزار یونٹس جڈاں جو اسلام آباد اچ 19 ہزار یونٹس پہلے مرحلے اچ بنڑائے ویسن۔ وزیراعظم کوں ڈسایا گیا جوچکلالہ اچ سی ڈی اے دی زمین تے 30 ہزار اپارٹمنٹس بنڑاونڑ دامنصوبہ تے وی غور تھیندا پئے۔ ایندے علاوہ جی 13 اتے جی 14 سیکٹر اچ پرائم لینڈ تے 6 ہزار اپارٹمنٹس بنڑاونڑ سانگے وی کم تھیندا پئے۔ وزیراعظم عمران خان نواں پاکستان ہاﺅسنگ پروگرام تے تکھے عملدرآمد اتے غیر ملکی سرمایہ کاراں ولوں ایںمنصوبے اچ گھاٹی دلچسپی تے اطمینان دا اظہار کیتا۔ وزیراعظم آکھیاجو نواں پاکستان ہاﺅسنگ پروگرام نال ملک دی مجموعی شرح نمو اچ ودھارا تھیسی، حکومت ولوں غیر ملکی سرمایہ کاراں کوں تعمیراتی کاروبار اچ ڈتی گئی سہولتاں سانگے کیتے گئے اقدامات دا حوالہ ڈیندے ہوئیںوزیراعظم آکھیا جو ٹیکنالوجی دی منتقلی، مقامی افرادی قوت دا استعمال اتے مقامی صنعت اچ روزگار دے مواقع نال وڈے پیمانے تے نہ صرف ملازمتاں ملسن بلکہ تعمیراتی صنعت نال وابستہ سارے شعبیں کوں وی فروغ ملسی۔
