وزیر اعظم عمران خان دے دورہ چین اچ ڈوہیں ملکاں وچال وڈی تعداد اچ مفاہمتی یادداشتا ں تے معاہدیں تے دستخط تھن ، ترجمان دفتر خارجہ

وزیر اعظم چینی صدر تے وزیر اعظم اتے آئی ایم ایف تے عالمی بینک دے عہدیداران ، تاجکستان ،ازبکستان، مصر، ملائیشیا، ایتھوپیا اتے جمہوریہ کرغز دے رہنماواں نال ملاقاتاں کیتیاں ، بیلٹ اینڈ روڈ فورم اتے بیجنگ انٹرنیشنل ہارٹیکلچر نمائش 2019ءدی افتتاحی تقریب اچ شرکت کیتی، ترجمان دفتر خارجہ
اسلام آباد ۔ 29 اپریل (اے پی پی) وزیراعظم عمران خان دا چین دا 4 ڈینھ دا سرکاری دورہ مکمل تھی گے ، وزیر اعظم چین دے صدر شی جن پنگ دی دعوت تے ڈوجھے بیلٹ اینڈ روڈ فورم اتے بیجنگ انٹرنیشنل ہارٹیکلچر نمائش 2019ءدی افتتاحی تقریب اچ شرکت کیتی ۔ دفتر خارجہ دے ترجمان ولوں سنوار کوں جاری اعلامیہ دے مطابق وزیر اعظم عمران خان 25 توں28 اپریل تئیں چین دا سرکاری دورہ کیتا ۔ وزیراعظم 26 اپریل کوں بیلٹ اینڈ روڈ فورم دی افتتاحی تقریب نال کلیدی خطاب کیتا۔ انہاں چینی صدر شی جن پنگ ولوں ہوں ڈینھ دی شام عالمی رہنماواں دے اعزاز اچ ڈتی ونجنڑ آلی ضیافت اچ وی شرکت کیتی ۔ 27 اپریل کوں وزیر اعظم عالمی رہنماواں دی گول میز کانفرنس دے پہلے سیشن نال وی خطاب کیتا ۔ایں گول میز کانفرنس دا موضوع ” رابطیں اچ ودھارے دے ذریعے ترقی دے نویں وسائل دی تلاش “ ہئی ۔اپنڑے بیان اچ وزیر اعظم بیلٹ اینڈ روڈ تعاون کیتے 4 نویں علاقہ جات دی نشاندہی کیتی۔ انہاں اچ ڈیجیٹل رابطے ، افرادی قوت دی منتقلی، ثقافتی رابطے علم تے احیاءکیتے ہک ڈوجھے دتجربیں توں مستفید تھیونڑ شامل اے ۔ وزیر اعظم دے رلے وفاقی وزیر اعلیٰ سرکاری حکام وی وفد اچ شامل ہن ۔ وزیر اعظم اتے انہاں دے وفد نائب صدر تے انہاں دی شان ولوں ڈتی ونجنڑ آلی ضیافت اچ شرکت کیتی ۔ وزیر اعظم چینی صدر شی جن پنگ اتے وزیر اعظم لی کی چیانگ نال 28 اپریل کوں ملاقات کیتی ۔ انہاں ملاقاتاں دے دوران ڈوہیں پاسوں سی پیک سمیت سانجھے تعاون دی مجموعی سطح دا جائزہ گھدا ۔ ڈوہیں پاسوں ایں عزم دا اعادہ کیتا جو ہر موسم اچ آزمودہ تزویراتی تعاون دی شراکت داری کو ںمزید مستحکم بنڑایا ویسی۔ ڈوہیں پاسوںاہم علاقائی اتے عالمی امور تے وی گال مہاڑ کیتی گئی جیں اچ افغانستان اچ امن اتے مفاہمت، جنوبی ایشیاءاچ امن و استحکام شامل اے تے تعلقات کوں مزید مستحکم بنڑاونڑ تے اتفاق کیتا۔ چینی ہم منصب دے نال ملاقات اتے ڈوہیں ملکاں وچال مفاہمتی یادداشتا ں اتے معاہدیں تے دستخط کیتے گن انہاں اچ چین پاکستان آزادانہ تجارت دے ڈوجھے مرحلے اتے ایم ایل ون دا معاہدہ شامل اے۔ بیلٹ اینڈ روڈ فورم دے موقع تے وزیر اعظم تاجکستان ،ازبکستان، مصر، ملائیشیا، ایتھوپیا اتے جمہوریہ کرغز دے عالمی رہنماواں نال ملاقاتاں تے گال مہاڑ کیتی ۔ایندے علاوہ عالمی مالیاتی ادارے دی منیجنگ ڈائریکٹر تے ورلڈ بینک دے چیف ایگزیکٹو افسر نال وی ملاقات کیتی بیلٹ اینڈ روڈ فورم اچ شریک کارپوریٹ اتے بزنس نمائندیں نال وی ملاقاتاں کیتیاں ۔وزیر اعظم دے رلے وزیر خارجہ، وزیر منصوبہ بندی، ترقی و اصلاحات، وزیر توانائی ، وزیر ریلوے، وزیر اعظم دے مشیر تجارت و خزانہ ، چیئرمین سرمایہ کاری بورڈ وی رلے ہن ۔ انہاں وزیراں تے مشیراں 25 اپریل کوں بیلٹ اینڈ روڈ تھیماٹک فورم اچ پاکستان دی نمائندگیکیتی انہاں اپنڑے چینی ہم منصباںتے وزیراں نال ملاقات وی کیتی ۔ وزیراعظم دا چین دا اے ڈوجھا دورہ اے جیں موقع تے انہاں چینی قیادت نال سانجھے تے علاقائی امور تے گال مہاڑ دا موقع ملیا ۔