وزیر خارجہ مخدوم شاہ محمود قریشی دا نسٹ یونیورسٹی اچ تقریب نال خطاب

اسلام آباد ۔ 3 اپریل (اے پی پی) وزیر خارجہ مخدوم شاہ محمود قریشی بدھ کوں نسٹ یونیورسٹی اچ خطاب کریندے ہوئیں آکھیا جوپلوامہ حملے تے بھارت جارحیت دا مظاہرہ کیتا،بھارت دے جارحانہ رویہ ڈوہائیں ملکاں کوں جنگ دی نوبت تئیں گھن آیا۔انہاں آکھیاجوموجودہ حالات اچ قومی گٹھ جوڑ دی ضرورت ہے، پاکستان دے مفادات سانگے اساں سارے ہک مٹھ ہسے،انہاں آکھیا جو مقبوضہ کشمیر اچ انسانی حقوق دی خلاف ورزی جاری ہے اتے اتھاںکشمیری مشکل اچ زندگی گزاردے پن۔مسئلہ کشمیر تے عالمی برادری دی چپ سمجھ توں باہر ہے۔وزیر خارجہ آکھیا جو آندے کجھ ڈینھاں اچ اساکوںجنہاں اہم چیلجز دا سامنڑاں ہو سی انہاں اچ بلوچستان وی ہے۔انہاں آکھیاجو بلوچستان سانگے اساں بے خبر کائنی ہسے۔وزیر خارجہ آکھیاجو فاٹا کوں مرکزی دھارے اچ گھن آونڑ سانگے میں اپنڑیں پارٹی دی نمائندگی کیتی اتے ہنڑ اللہ دے فضل نال فاٹا مرکزی دھارے اچ شامل تھی گئے۔انہاں آکھیا گلگت بلستان اچ کجھ طاقتاں ولوں ہک تحریک کوں ہوا ڈتی ویندی پئی ہے ،تاں جو اوہ اساڈے کنوں لکی ہوئی کائنی ۔انہاں آکھیا جواساڈی حکومت نیشنل ایکشن پلان تے عملدرآمد یقینی بنڑیسی۔وزیر خارجہ آکھیاجو بھارت، پاکستان کوں اقتصادی لحاظ نال کمزور کرنڑ پاروں گرے لسٹ ا چ شامل کرنڑ کیتے اپنڑیاں ساریاں کوششاں استعمال کریندا پئے ۔انہاں آکھیا جو وزیراعظم عمران خان اپنڑیں پہلی تقریر اچ ہندوستان کوں واضح پیغام ڈتا ہا جو اگر تساں امن ول ہک قدم اگی تے ودھسو تاں اساں ڈ وقدم اگی تے ودھسوں۔