لاہور۔یکم اپریل (اے پی پی )وزیر خارجہ شاہ محمود قریشی آکھیے جوپاکستان دا مستقبل محفوظ ہتھاں اچ اے،نویں پاکستان اچ بھارتی جارحیت دا منہ بھن جواب ڈتا گئے،ایں جواب نال دنیا کوں وی پیغام گئے جو اے نواں پاکستان اے ،بھارتکوں پیغام ڈیونڑ چاہنداں جو پاکستان دی نویں نسل کوں مت چھیڑو کیوں جو اے وطن کیتے قربانیاں ڈیونڑ کیتے تیار ہن ۔او گزریل ڈینھ اتھاں یونیورسٹی آف مینجمنٹ اینڈ ٹیکنالوجی دے 17ویں سالانہ کانوکیشن توں خطاب کریندے پئے ہن ۔ایں موقع تے صدر یو ایم ٹی ابراہیم حسن مراد ، چیئر مین ڈاکٹر احمدعمر ، ریکٹر ڈاکٹر محمد اسلم ، اساتذہ، طلبہ و طالبات اتے انہاں دے والدین دی بہوں ساری تعداد موجود ہئی ۔وزیر خارجہ آکھیے جو تحریک انصاف دی کامیابی اچ بہوں وڈا حسہ نینگراں تے باہرلے ملک رہنڑ آلے پاکستانیاں دا اے ،ہنڑ درست پاسے ٹرنڑ دے فیصلے دا وقت آگے ۔انہاں آکھیا جو نیشنل ایکشن پلان تے عملدرآمد جاری اے ، دہشت گردی دے خلاف بے پناہ کامیابیاں حاصل کیتن، مقبوضہ کشمیر دا مسئلہ مذاکرات نال حل تھیونڑاں چاہیدے ۔دنیا بدلددا پاکستان ڈیکھدی پئی اے ۔انہاںآکھیا جو پہلے امیر طبقہ پاکستان دی دولت باہر منتقل کریندا ہئی تاں ڈکھ تھیندا ہئی ہنڑ اینویں کائنی اج دے نینگراں دا عزم کجھ بیا اے ۔نینگر نسل اقبال دے خواب کوں تعبیر ڈیسی۔ کانووکیشن اچ 322 بیچلرز، 130 ماسٹرز، 283 ایم ایس، ایم فل اتے 4 پی ایچ ڈی طلبہ اچ ڈگریاں تقسیم کیتیاں گیاں ۔کانوکیشن اچ 5 پیٹرن ولوں گولڈ میڈلز، 5 ریکٹر میڈلز، 6 ریکٹر اکیڈیمک ایکسیلنس ایوارڈز تے 3 سرٹیفکیٹس آف ایکسیلنس ایوارڈز تقسیم کیتے گے ۔
