لاہور/اسلام آباد ۔ 6 مئی (اے پی پی) وزیر اعظم دی معاون خصوصی اطلاعات ونشریات ڈاکٹر فردوس عاشق اعوان آکھیے جو تحریک انصاف دی حکومت دے فلاح عامہ کیتے اقدامات نال عوام کوں ریلیف ملسی۔اے گال انہاں لاہور اچ وزیر اعلیٰ پنجاب سردار عثمان بزدار نال ملاقات دے دوران آکھی۔ ملاقات اچ سانجھی دلچسپی دے امور ،سیاسی صورت حال تے ملکی امور تے گال مہاڑ کیتی گئی ۔ملاقات اچ وفاق تے صوبے دے شعبہ اطلاعات وچال رابطے کوں مزید بہتر بنڑاونڑ تے گال مہاڑ کیتی گئی۔ ڈاکٹر فردوس عاشق اعوان آکھیا جو وزیراعلیٰ پنجاب سردار عثمان بزدار صوبے دے عوام دی خدمت کیتے بے مثال اقدامات کیتن۔ ایں ملاقات اچ وزیر اعلیٰ پنجاب سردار عثمان بزدار آکھیا جو تحریک انصاف دی حکومت شفافیت دے نویں کلچر کوں پروان چڑھائے ، ہر سطح تے شفافیت کوں ودھا تے قومی وسائل کوں بچایا گے ۔انہاں آکھیا جو کرپشن دے خلاف زیرو ٹالرنس دی پالیسی دے مثبت نتیجے سامنڑے آگن۔ماضی اچ کرپٹ عناصر کرپشن کرتے اداریں کوں کھوکھلا کر ڈتے تے معشیت برباد کیتی۔وزیر اعلیٰ پنجاب آکھیا جوملک لٹنڑ آلیں دا بلاامتیاز احتساب ضروری اے ، اساڈی حکومت قومی اداریں دے نال معیشت دی پائیدار بنیادا ں تے بحالی تے توجہ ڈیندی پئی اے ۔
