اسلام آباد ۔ 16مئی (اے پی پی) وزیراعظم دے معاون خصوصی برائے صحت ڈاکٹر ظفر مرزا آکھیا جو ساری دوائی بنڑاونڑ آلی کمپنیاں 20مئی2019ءتئیں دوائیں دے نرخ 75فیصد تئیں گھن آون،اینویں نہ کیتا گیا تاں ڈرگ کورٹ نال رابطہ کریسوں،حکومت صحت دے شعبے اچ چنگائی سانگے چنگی حکمت عملی دے تحت کم کریندی پی اے جئیں دا فائدہ عوام کوں تھیسی،سارے سانجھے داراں نال رل تے قومی دوائی پالیسی بنڑیندے پیوں،پالیسی سارے سانجھے داراں کوں مشورے ڈیسی اتے نرخ،معیارات اتے ریگولیشنز دے اہداف بارے ڈسیسی،دوائی دے معیار اتے قوانین سمیت سارے مسئلیاں کوں حل کیتا ویسی۔اے گالھیںانہاں خمیس کوں پریس کانفرنس نال خطاب کریندیں ہوئیں آکھی۔انہاں آکھیا جو 2018ءاچ 464دوائیں دے نرخ ودھائے گئے اتے بہوں دوائیں مارکیٹ اچوں غائب کر ڈتیاں گئیاں ہن جئیں پاروں مریضاں کوں بہوں اوکھ تھئی ،انہاں آکھیا جو 31دسمبر2018 ءکوں 889دوائیں کوں ایس آراو اچ رلایا گیا جئیں دے تحت دوائیں دے نرخ طے کیتے گئے ۔انہاں آکھیا جو وزیراعظم عمران خان دا وژن صحت دے شعبے اچ غریب طبقے کوں ساری سہولتاں ڈیونڑ یقینی بنڑاونڑ اے۔
