نیویارک ۔ 24 مئی (اے پی پی) پاکستان مقبوضہ کشمیر اچ بھارتی فوج دے کشمیریاں دے خلاف ظلم تے زیادتیاں تے پوری دنیا دی توجہ کرویندے ہوئیں اقوام متحدہ دی سلامتی کونسل مطالبہ کیتے جو او اپنڑے ایجنڈے تے لمبے عرصے توں موجودہ جھیڑیں کوں حل کرے۔اقوام متحدہ اچ پاکستان دی مستقل مندوب ڈاکٹر ملیحہ لودھی سلامتی کونسل دے اجلاس اچ ”مسلح جھیڑے اچ شہریاں دے حقوق دے تحفظ“دے موضوع تے ہک کھلی بحث اچ خطاب دے دوران مقبوضہ جموں تے کشمیر اچ بین الاقوامی انسانی حقوق دے قوانین دیاں مسلسل خلاف ورزیاں دا حوالہ ڈیندے ہوئیں آکھیے جو وڈے پیمانے تے انسانی زندگیاں دی قیمت تے غیر ملکی جارحیت تے قبضے جہیے واقعات اچ سلامتی کونسل ولوں کوئی ایکشن کیوں نی گھدا ویندا پیا ۔پاکستانی سفارت کار آکھیے جو مقبوضہ جموں تے کشمیر اچ قابض بھارتی فوج منظم طور تے بین الاقوامی انسانی حقوق دے بنیادی اصولاں دی خلاف ورزی اتے انسانی ڈھالاں دے طور تے شہریاں دے استعمال کریندے ہوئیں بین القوامی انسانی حقوق اتے قوانین دیاں دھوڑاں پٹ ڈتن جنہاں کوں غیر معمولی طور تے نظر انداز کیتا ویندا پئے، ایں طرح دے جرائم کرنڑ آلیں کوں نہ صرف سیاہ قوانین دے تحت تحفظ ڈتا ویندے بلکہ انہاں کوں فوجی کمانڈ ولوں اعزاز وی ڈتے ویندن ۔انہاں آکھیا1949 دے جینوا کنونشنز اتے اضافی پروٹوکولز اچ مسلح جھیڑے اچ قواعد تے ضوابط کوں واضح طور تے بیان کیتا گے جیرھا جو بین الاقوامی انسانی حقوق دی گہری بنیاداں تشکیل ڈیندن انہاں قانون دا مذاق اڈایا ویندا پئے تے تریمتاں کوں ظلم تے بربادی برداشت کرنڑ کیتے کلہا چھوڑ ڈتا ویندے ۔
