مسلم لیگ (ن)جنوبی پنجاب صوبے دے قیام اچ اساڈا ساتھ ڈیوے ،وزیر خارجہ شاہ محمودقریشی

ملتان ۔15 مئی (اے پی پی)وزیرخارجہ مخدوم شاہ محمودقریشی آکھیے جو مسلم لیگ (ن)کوں وی قومی اسمبلی اچ پیش کیتے ونجنڑ آلے جنوبی پنجاب صوبے دے ترمیمی بل دی حمایت کرنڑیں چاہیدی اے ۔انہاں آکھیا جو مسلم لیگ(ن) ہنڑ اپنڑے فیصلے تے نظر ثانی کریندے ہوئیں جنوبی پنجاب کوں صوبہ بنڑنڑ ڈیوے ۔انہاں آکھیا جو مسلم لیگ ن اچ بہوں سارے لوک جنوبی پنجاب صوبے دے حق اچ ہن لیکن ن لیگ دے کجھ لوک ماضی اچ ایں بل دی قید اچ پھسیے پئے ہن جیرھا انہاں پیش کیتا ہئی ۔سرکٹ ہاﺅس ملتان اچ بدھ دے ڈینھ پریس کانفرنس نال خطاب کریندے ہوئیں شاہ محمود قریشی آکھیا جو بہاولپور صوبہ ویسے وی منطقی گال کائنی ،جنوبی پنجاب صوبے دی جدوجہد گزریل کئی عشریں توں جاری اے ،اے کیویں ممکن اے جو صرف ترائے ضلعیں تے مشتمل صوبہ بنڑایا ونجے ،ایندی انجھ اسمبلی ہووے تے سینیٹ اچ وی ایندیاں سیٹاں ہوون ،ایں طرح گال اگی تے ودھدی ڈکھالی کائنی ڈیندی پئی ۔انہاں آکھیا جو صوبے دے قیام کیتے ڈو تہائی اکثریت ضروری اے تے اساں ایندے تے اتفاق رائے کیتے کوششاں جاری رکھیسوں ۔انہاں آکھیا پاکستان پیپلزپارٹی ایں صوبے دے قیام کیتے اساڈے رلے اے ،میں انہاں نال جیرھا ابتدائی رابطہ کیتا ایندا مثبت جواب ملیے ،اساں رل تے اگی تے ودھسوں ،ماضی اچ ڈو تہائی اکثریت نہ ہوونڑ پاروں پاکستان پیپلزپارٹی اے صوبہ نی بنڑا سگی ہنڑ اینکوں اساڈا ساتھ ڈیونڑاں چاہیدے ۔انہاں آکھیا پیپلزپارٹی دے نال اگلے اجلاس اچ خورشید شاہ ،نوید قمر اتے راجہ پرویز اشرف دے نال ایں مسئلے تے مزید گال مہار تھیسی اساں قومی اسمبلی اچ ن لیگ سیمیت بیاں جماعتاں کوں وی قائل کریسوں تے انہاں کوں ڈسیسوں جو صوبیں دے قیام نال وفاق کمزور نی مضبوط تھیندے ۔انہاں آکھیا جو پہلے مرحلے اچ پاکستان تحریک انصاف جنوبی پنجاب صوبے دے قیام کوں اپنڑے منشور دا حصہ بنڑایا ہئی ڈوجھے مرحلے اچ اساں ہک قدم اگی تے ودھ گیوں اساں قومی اسمبلی اچ صوبے دے قیام کیتے آئینی ترمیمی بل پیش کرڈتے ،اے بل تحریک انصاف دے ترائے رہنماواں پیش کیتے جیں اچ بہاولپور توں سمیع الحق گیلانی، ڈیرہ غازی خان توں نصر اللہ دریشک اتے ملتان توں پیر ظہور حسین قریشی شامل ہن،بل منظور تھیونڑ دے بعد ہنڑ سپیکر قومی اسمبلی کوں ہک خصوصی کمیٹی تشکیل ڈیونڑ دا اختیار مل گے جیرھا جو آئینی ترمیم تے مشاورت اتے اتفاق رائے دے حصول کیتے کوششاں کریسی تے اساکوں یقین اے جو ایندے تے پیش رفت دے بہوں زیادہ امکانات ہن ۔شاہ محمود قریشی آکھیا جو تحریک انصاف جیرھا جو آئین اچ ترمیم دا بل پیش کیتے او ایندے اچ آئین دے آرٹیکل 1 ، آرٹیکل 51، 59،106،198 اتے 218 اچ ترمیم تجویز کیتی گئی اے ،انہاں آرٹیکلز اچ ترمیم دے بعد جنوبی پنجاب صوبہ حقیقت دا روپ دھارگھنسی۔انہاں آکھیا جوآرٹیکل 1 دی شق 2 اچ ترمیم دے ذریعے آئین اچ ساﺅتھ پنجاب دا لفظ شامل کیتا ویسی ایں طرح اے تشریح موجود اے جو ساﺅتھ پنجاب توں مراد کیا اے تے اے علاقہ کیرھا ہوسی،اے صوبہ ملتان ،بہاولپور اتے ڈیرہ غازی خان ڈویژناں دے ضلعیں تے مشتمل ہوسی ۔آرٹیکل51 اچ ترمیم دے ذریعے ہک انجھ اسمبلی وجود اچ آسی ۔آٰرٹیکل 59 اچ ترمیم دے ذریعے پاکستان دے صوبیں دی تعداد چار دی بجائے پنج قرار ڈتی ویسی۔ترمیمی بل اچ سینیٹ اچ جنوبی پنجاب دی نمائندگی تے سینیٹ دیاں سیٹاں اچ ودھارے دا طریقہ کار وی وضع کیتا گے۔آرٹیکل 106دے تحت صوبہ جنوبی پنجاب دی اسمبلی دیاں 120 سیٹاں ہوسن جیں اچ 95 نمائندے براہ راست الیکشن دے ذریعے منتخب تھیسن۔22 نشستاں بلواسطہ ہوسن 3 اقلیتی ارکان ہوسن۔ایں آرٹیکل دے مطابق اتلے پنجاب دیاں سیٹاں دی تعداد 251 رہ ویسی ۔آرٹیکل 198اچ ترمیم دے ذریعے جنوبی پنجاب دی انجھ ہائی کورٹ قائم تھیسی جیں دا اپنڑاں چیف جسٹس ہوسی۔ملتان ایندی پرنسپل سیٹ ہوسی تے بہاولپور بنچ جنوبی پنجاب ہائی کورٹ دے ماتحت ہوسی۔انہاں امید ظاہر کیتی جو ایں بل دی منظوری دے بعد ایں خطے دے عوام دا بہوں پرانڑاں کواب پورا تھی ویسی تے جنوبی پنجاب صوبے دے قیام نال ایں خطے اچ ترقی تے خوشحالی دے نویں دوردا آغاز تھیسی ۔شاہ محمود قریشی آکھیا جو جنوبی پنجاب دے عوام انجھ صوبے دے وعدے تے اساکوں مینڈیٹ ڈتے ۔انہاں آکھیا جو طارق بشیر چیمہ اساڈے دوست ہن ،ق لیگ دی قیادت کوں متحدہ صوبے دے قیام کیتے اعتماد اچ گھدا ویسی ۔انہاں آکھیا جو یکم جولائی تئیں جنوبی پنجاب سیکرٹریٹ وی فعال تھی ویسی ۔