ملک اچ توانائی دیاں ضرورتاں کوں پورا کرنڑ کیتے ملکی تاریخ اچ پہلی واری آندے 25 سال کیتے طلب تے رسد دا پلان مرتب کیتا گے ،وزیراعظم عمران خان دی زیر صدارت توانائی دے شعبے اچ کیتی ونجنڑ آلی اصلاحات تے ہنڑ تئیں پیشرفت تے اعلیٰ سطحی اجلاس کوں بریفنگ

اسلام آباد ۔ 6 مئی (اے پی پی) ملک اچ توانائی دیاں ضرورتاں کوں پورا کرنڑ کیتے ملکی تاریخ اچ پہلی واری آندے 25سال کیتے طلب تے رسد دا پلان مرتب کیتا گے ،قابل تجدید ذرائع توں بجلی دی پیداوار دی نویں پالیسی بنڑائی گئی اے ،ایں پالیسی دا مقصد2025ءتئیں کل پیداوار دا 20 فیصد قابل تجدید ذرائع توں بجلی حاصل کرنڑ جڈاں جو 2030ءتئیں اے شرح 30 فیصد تئیں گھن ونجنڑ اے۔اے گال وزیراعظم عمران خان دی زیر صدارت توانائی دے شعبے اچ کیتی ونجنڑ آلی اصلاحات اتے ہنڑ تئیں تھیونڑ آلی پیشرفت تے اعلیٰ سطحی اجلاس اچ ڈتی ونجنڑ آلی بریفنگ دے دوران ڈسائی گی ۔اجلاس اچ وزیرِ توانائی عمر ایوب خان، مشیر خزانہ ڈاکٹر عبدالحفیظ شیخ، معاون خصوصی برائے پٹرولیم ندیم بابر، معاون خصوصی برائے اطلاعات ڈاکٹر فردوس عاشق اعوان، ترجمان ندیم افضل چن، معاون خصوصی یوسف بیگ مرزا، سیکرٹری پاور عرفان علی تے بئے افسران شریک ہن ۔ وزیراعظم کوں توانائی دے شعبے اچ اصلاحات،بجلی طوری کوں روکنڑ،ترسیل تے ونڈ دے عمل اچ رکاوٹاں کوں دور کرنڑ ،گردشی قرضیں دے مسئلے تے قابو پاونڑ تے بئے متعلقہ معاملات تے تفصیلی بریفنگ ڈتی گئی ۔ وزیرِاعظم کوں ڈسایا گیا جو مالی سال 2017-18ءاچ محض ہک سال اچ گردشی قرضیں اچ 450ارب روپے دا ودھارا تھئے ۔اکتوبر 2018اچ موجود حکومت ولوں چوری روکنڑ تے واجبات دیاں وصولیاں دے سلسلے اچ باقاعدہ مہم شروع کیتی گئی جیں دے مثبت نتیجے سامنڑے آندے پن ۔ دسمبر 2018ءتوں مارچ 2019ءتئیں بجلی چوری کوں روکنڑ تے واجب الادا رقماں دیاں وصولیاں دی مد اچ محض 4 مہینے اچ 48 ارب دی اضافی رقم وصول کیتی گئی جیرھی جو اجوکے سال دے چھیکڑ تئیں 80ارب تئیں پج ویسی ۔ اضافی وصولیاں آندے سال110 ارب تئیں پج ویسن جڈاں جو جون 2020ءتئیں 190 ارب روپے کٹھے کرنڑ دی توقع اے۔ وزیرِاعظم کوں ڈسایا گیا جو توانائی دے شعبے اچ چوری، تکنیکی وجوہات اتے ترسیل تے تقسیم دے ضمن اچ تھیونڑ آلے ضیان تے قابو پاونڑ تے خصوصی توجہ ڈتی ویندی پئی اے جیں دے مثبت نتیجے سامنڑے آندے پن۔وزیرا عظم کوں ڈسایا گیا جو ایکسپلوریشن اینڈ پروڈکشن دے ضمن اچ 40 بلاکس دی نشاندہی کر گھدی گئی اے ۔انہاں بلاکس کوں بروئے کار گھن آونڑ دے سلسلے اچ معروف غیر ملکی کمپنیاں کوں راغب کرنڑکیتے بین الاقوامی طور تے روڈ شوز دا انعقاد کیتا ویسی تاں جو جدید ٹیکنالوجی دی حامل غیر ملکی کمپنیاں کوں پاکستان اچ سرمایہ کاری دی ترغیب ڈتی ونج سگے تے تیل و گیس دے ذخیرے توں فائدہ چاتا ونج سگے۔