اسلام آباد ۔ 2 مئی (اے پی پی) صدر مملکت ڈاکٹر عارف علوی آکھیے جو وفاقی محتسب سائلین کوں وفاقی سرکاری اداریں دے خلاف سستا تے فوری انصاف ڈیندا پئے، وفاقی محتسب اپنڑے کم تے فیصلیں متعلق عوام کوں آگاہی ڈیوے میڈیا تے سوشل میڈیاتے وی معلومات ڈتیاں ونجن ، وفاقی محتسب دے فیصلیں دے خلاف اپیلاں کوں ہک ڈینھ اچ نبیڑ ڈینداں ، وفاقی محتسب دے فیصلیں تے 95 فیصد عمل درآمد بہترین کارکردگی اے۔ اے گال انہاں خمیس کوں وفاقی محتسب دی نویں ویب سائیٹ اتے موبائل ایپ دا افتتاح کریندے ہوئیں آکھی اے۔ ڈاکٹر عارف علوی آکھیا جو وفاقی محتسب بہوں چنگاں ادارہ اے جیرھے جو چنگے انداز اچ لوکاں دے مسلے حل کریندا پئے ،لوکاں کوں بجلی تے گیس جیہاں بنیادی ضرورتاں دے حصول اچ رشوت ڈیونڑیں پوندی اے ایندے باوجود انہاں دے مسلے لمبے عرصے اچ حل تھیندن لیکن وفاقی محتسب ایجھا ادارہ اے جیرھا قانون دے مطابق انہاں لوکاں دی مدد کر سگدے ۔انہاں آکھیا وفاقی محتسب دی کاکردگی قابل تعریف اے ۔ وفاقی محتسب کوں گزریل سال 70 ہزار توں ودھ کیس ملیے جیں اچوں 90 فیصد کیس نبیڑ ڈتن ، اے ادارہ 188 وفاقی سرکاری اداریں دے خلاف شکایتاں سنڑدے ،ایں وقت ملک اچ پنج مختلف محتسبین کم کر یندے پن ہیں، جیویں وفاقی محتسب تکھے مقدمیں نبڑیندا پئے ایجھا ملک اچ کوئی ادارہ کائنی جیرھا اتنی وختی انصاف ڈیوے ۔ وفاقی محتسب دے مقدمیں اچ اپیل دا حق وی اے ،انہاں آکھیا وفاقی محتسب دے فیصلے دے خلاف اپیل صدر مملکت کوں کیتی ونج سگدی اے میں صدر مملکت دی حیثیت نال وفاقی محتسب دے فیصلیں دے خلاف آونڑ آلیاں اپیلاں کوں ہک ڈینھ اچ نبیڑ ڈینداں۔
