اسلام آباد ۔ 27 مئی (اے پی پی) وفاقی وزیر مواصلات مراد سعید سنوار کوں قومی اسمبلی اجلاس اچ خطاب کریندے ہوئیں آکھیا جو آئین پاکستان دا حلف چاونڑ آلے سکیورٹی فورسز سمیت آئینی اتے ریاستی اداریاں دا احترام کرنڑ‘ ترقی اتے خوشحالی دے سفر اچ روڑے نہ آڑاون‘ا یہ ویلھا زخماں تے مرہم رکھنڑ دا ہے‘ محسن داوڑ این ڈی ایس دے عہدیدار امتیاز وزیر دے نال اپنڑے تعلق دی وضاحت کرنڑ۔ قومی اسمبلی اچ خواجہ محمد آصف ولوں چاتے گئے نکات دا جواب ڈیندے ہوئیں وفاقی وزیر مواصلات آکھیاجو کل جو واقعہ تھئے ایندیاںویڈیو فوٹیجز موجود ہن جو کیویں فوجی چوکی تے حملہ کیتا گیا‘ اتھاں کیویں دے بیان ڈتے گئے اتے ایں ایوان دے رکن جیرھا اشتعال ڈیوایا‘ اوہ پوری قوم دے سامنڑے ہے۔ وزیرستان اچ ڈو ترائے ڈینھ توں دھرنا جاری ہا۔ پرامن ماحول ہا‘ مطالبات پورے تھیونڑ ویندے پئے ہن،اتے معاملہ وی مکدا پیا ہا۔ ایجھا ٹائم اچ اسلام آباد توں ٹیلی فون ویندے جو دھرنا ختم نہ کیتا ونجے ۔ ایندے بعد چوکی تے حملہ تھیندے اتے فوجی جوان سمیت عام لوک وی مردن ۔انہاں آکھیا جو 2009ءاچ پیپلز پارٹی د ی حکومت ہائی‘تساں آپریشن اچ کامیابی دے بعد ترقی تے خوشحالی سانگے اقدامات کیوں نہ کیتے۔ انہاں آکھیا جو جڈاں ڈرون حملے تھیندے پئے ہن اساں احتجاج کریندے ہاسے تاں ایہو محسن داوڑ ڈرون حملیاں دی حمایت سانگے سبھ توں اگی تے ہن۔ اساں جڈانیٹو سپلائی لائن بند کریندے تاں ایندی حمایت اچ اگے تے آندے۔ اے پی ایس دا سانحہ جڈاں تھیا تاںساریاںجماعتاں آکھیا جو دہشت گرداں اتے دہشتگردی دی سوچ مکاونڑ چاہیدی ہے۔ اے پی ایس دے بعد چارسدہ یونیورسٹی اچ حملہ تھیا،جیندے اچ پتہ لگیا جو حملے اچ افغانستان دے شہری اتے افغانی سماں استعمال تھئیاں۔ بارڈر تے فنسنگ سانگے جڈاں اسانقرارداد ایوان اچ پیش کرنڑ دی کوشش کیتی تاں محسن داوڑ اتے محمود خان اچکزئی ایندی مخالفت کیتی۔ اساںرا اتے این ڈی ایس دے گٹھ جوڑ کوں بے نقاب کرنڑ۔ا یہ لوک نئیں چاہندے جو پاکستان دی سرحداں محفوظ ہونڑ۔ مراد سعید آکھیا جواوہ خود آئی ڈی پی رہے ہن۔انہاں آکھیا جواساں پچھلی حکومت توںصرف ایہ پوچھنڑچاہندوں جو اگر تساں آپریشن داکامیابی دا کریڈٹ گھندے پئے ہیوے تاں ایندے کریڈٹ دے نال تساڈی جو ذمہ داری ہائی ا وہ تساں پوری کیوں نئیں کیتی۔ 80 فیصد قبائلی عوام تساڈی غلط پالیسیاں دی وجہ نال واپس نئیں ونج سگے ۔ انہاں آکھیا جو فاٹا اتے پشتون علاقیاں اچ شناختی کارڈز بلاک تھئے تاں اساڈی کوششاں نال ڈیڈھ لکھ دے نیڑے شناختی کارڈز دوبارہ بحال تھئے۔ ایندے وچوں 25 ہزار اج وی بند ہن۔ محمود خان اچکزئی افغانیاں دے 25 ہزار جعلی شناختی کارڈ بنڑوائے ہن۔
