اسلامی تعاون تنظیم دے سربراہ اجلاس دا مشترکہ اعلامیہ جاری،دہشت گردی کوں کہیں وی مذہب یاقومیت نال جوڑن دا رویہ مستردکر ڈتے

اسلام آباد ۔ یکم جون (اے پی پی) اسلامی ملکاں دی تعاون تنظیم دے سربراہ اجلاس دہشت گردی کوں کہیں وی مذہب یاقومیت نال جوڑن دا رویہ مستردکریندے ہوئے مقبوضہ فلسطینی علاقیاں اچ حقائق بدلنڑ،ڈو ریاستی حل کوں نقصان پچاونڑ دے اسرائیلی اقدامات دی مذمت کیتی اتے دہشت گرد تنظیماں اتے دہشت گرداں دے خلاف ہک مٹھ تھیونڑ تے اتفاق کیتے۔اجلاس دے مکنڑ تے جاری کیتے گئے مشترکہ اعلامیہ اچ آکھیا گئے جو او آئی سی رکن ملک اپنڑے سفارت خانے بیت المقدس منتقل کرنڑ آلے ملکاں دے خلاف مناسب اقدامات کرن۔اجلاس امن بقائے باہمی ایجنڈے دا مطالبہ کریندے ہوئے دہشت گردی دہشت گردی دی لعنت مکاونر دی اہمیت تے زور ڈیندے آکھیے جو خلیجی خطے اچ دہشت گردی دیاں کارروائیاں جہازاں دی سیکورٹی اتے تیل دی عالمی رسد کیتے ہک وڈا خطرہ ہین،سیکورٹی اتے استحکام کوں برقرار کھیندے اتے مسلم معاشراں اچ خوشحالی یقینی بنڑاونڑ سانگے سرمایہ کاری اتے پائیدار ترقی دا راہ کھولنڑ دی لوڑھ اے۔رکن ملکاں،تنظیم دے اداریاں سودھے اسلامی ترقیاتی بنک اتے اسلامی یکجہتی فنڈ تے زور ڈتے جو اور کیمروس،جمہوریہ گینیا،آئیوری کوسٹ اتے سیری لیون نال انہاں دے ترقیاتی پروگراماں اچ ہتھ ونڈاون۔اجلاس مذہب،رنگ و عقیدہ دی بنیاد تے ہر قسم دے امتیازی سلوک،فرقہ واریت اتے عدم برداشت دی مذمت کیتی اتے میانمار اچ روہنگیا مسلماناں دی خراب حالی دی مذمت کریندے ہوئے تشدد بند کرنڑ تے زور ڈتے۔