اسلام آباد ۔ 3 جون (اے پی پی)وزیر اعظم عمران خان دی صدارت اچ پنجاب اتے خیبرپختونخوا دے ریسٹ ہاوسزکو ں سیاحت دے ودھارے کیتے استعمال کرنڑ سانگے ہنڑ تئیں دی پیش رفت دا جائزہ اجلاس تھیا۔ اجلاس اچ وزیر سیاحت پنجاب راجہ یاسر ہمایوں سرفراز، وزیر سیاحت خیبر پختونخوا محمد عاطف، چیف سیکرٹری خیبرپختونخوا محمد سلیم اتے بئے افسراں شرکت کیتی۔ وزیر سیاحت پنجاب اتے خیبرپختونخوا مختلف محکماں دے ریسٹ ہاوسزکو ں عوام اتے سیاحت سانگے استعمال اچ گھن آونڑ بارے تھیونڑ آلی پیش رفت بارے ڈسایا۔وزیر سیاحت پنجاب ڈسایا جو پنجاب اچ مختلف محکماں دے 177ریسٹ ہاوسز کوں عوام کیتے کھول ڈتا گئے ۔ چیف سیکرٹری خیبرپختونخوا محمد سلیم وزیر اعظم کو ں ڈسایا جو صوبہ خیبرپختونخوا اچ کل ریسٹ ہاوسز دی تعداد 157ہے ۔ وزیر اعظم ہدایت کیتی جو سرکاری ریسٹ ہاوسز کو ں عوام سانگے کھولنڑ حکومتی پالیسی دا حصہ ہے۔ ایں پالیسی دی راہ اچ کہیں قسم دی رکاوٹ برداشت کائنان کیتی ویسی ۔
