اسلام آباد ۔ 17 جون (اے پی پی) سپیکر قومی اسمبلی اسد قیصر نال ایرانی مجلس شوریٰ دے وفد ڈاکٹر احمد امیربادی فراھانی دی سربراہی اچ سنوار کوں پارلیمنٹ ہاﺅس اچ ملاقات کیتی جیں اچ ڈو پاسے تعلقات ، خطے دی سیاسی و معاشی صورتحال سمیت سانجھی دلچسپی دے بئے امور تے گال مہاڑ کیتی گئی ۔ایں موقع تے وفد نال گال مہاڑ کریندے ہوئیں سپیکر اسد قیصر آکھیا جو پاکستان تے ایران مذہب ،، اخوت ، ثقافت ، تاریخ اتے ہمسائیگی دے لازوال رشتیں اچ گھنڈیے پن ۔انہاں آکھیا جو پاکستان ایران نال اپنڑے نیڑے دے دوستانہ تعلقات کوں بہوں اہمیت ڈیندے ۔پاکستان پارلیمانی و اقتصادی رابطیں کوں ودھارا ڈے تے ایران نال موجودہ تعلقات کوں مزید ودھاونڑ چاہندے ۔ ڈوہیں ملکاں دے ارکان پارلیمنٹ ڈوہیں قوماں کوں نیڑے گھن آونڑ کیتے اہم کردار ادا کرسگدن،پاکستان سارے ہمسایہ ملکاں نال برابری سطح تے خوشگوار تعلقات چاہندے ۔ پارلیمانی سفارتکاری ڈوہیںبرادر اسلامی ملکاں اچ تعلقات کوں مستحکم کرنڑ اچ اہم کردار ادا کرسگدی اے ۔احمد امیربادی فراھانی سپیکرقومی اسمبلی نال گال مہاڑ کریندے ہوئیں آکھیے جو ایران خطے اچ امن کیتے پاکستان کوں اپنڑاں سانجھے دار سمجھدے ۔انہاں آکھیا خطے اچ سلامتی ، علاقائی ترقی اتے معاشی استحکام کیتے ڈوہیں ملکاں دی پارلیمان اچ نیڑے تعاون دی ضروری اے ۔ایران دی قیادت اتے حکومت ڈو پاسے تعلقات کوں مزید مستحکم بنڑاونڑ دی خواہش مند اے ۔دہشت گردی خطے دی ترقی کیتے وڈا خطرہ اے ایندے نال نبڑنڑ کیتے سانجھیاں کوششاں دی ضرورت اے ۔
