صدر ڈاکٹر عارف علوی نال آسٹریلیا دی سبکدوش تھیونڑ آلی ہائی کمشنر مارگریٹ ایڈمسن دی ملاقات

اسلام آباد ۔ 17 جون (اے پی پی) صدر مملکت ڈاکٹر عارف علوی خطہ اچ امن اتے اقتصادی خوشحالی سانگے کشمیر دے جھیڑے دے وختی حل دی ضرورت تے زور ڈیندے ہوئیں آکھیے جو پاکستان افغانستان اچ امن کوششاں اتے ایندی تعمیرنو دے عمل دا چنگا حامی ہے۔ انہاں ایہ گالھ آسٹریلیا دی سبکدوش تھیونڑ آلی ہائی کمشنر مارگریٹ ایڈمسن نال گالھ مہاڑ کریندے ہوئیں آکھی،جنہاں سنوار کوں ایوان صدر اچ عارف علوی نال چھیکڑی ملاقات کیتی۔ صدرمملکت ہائی کمشنر کوں پاکستان اچ انہاں دی مدت دی مکمل کرنڑ تے مبارخباد ڈیندے ہوئیں آکھیا جو پاکستان اتے آسٹریلیا وچال چنگی یاری ہے اتے ڈوہائیں ملکاں دے عوام دے فائدے سانگے انہاں رابطیاں کوں بیاودھاونڑ دی ضرورت ہے۔ انہاں پاکستان اتے آسٹریلیا وچال پارلیمانی رابطے اتے تجارت ودھاونڑ دی ضرورت تے زور ڈتا۔