اسلام آباد ۔ 13 جون (اے پی پی) وفاقی وزیر مواصلات مراد سعیدخمیس کوں پریس کانفرنس کریندے ہوئیں آکھیا جووزارت مواصلات اتے ماتحت اداریاں سانگے گھدے گئے قرضیاں دی تفصیل رضاکارانہ طور تے وزیراعظم احتساب کمیشن کوں ڈیسوں ‘ کرپٹ سیاستداناں اتے ملکی خزانہ لوٹنڑ آلیاں دا احتساب کرنڑ اتے انہاں کوں انصاف دی کچہری ی اچ کھڑا کریسوں،حکومت لوٹی گی قومی دولت واپس گھنڑ دی ذمہ داری پوری کریسی۔انہاں آکھیا جو روڈ بنڑاونڑ اتے انہاں دی مرمت سانگے موجودہ اتے سابقہ ادوار دے قرضیاں دی تفصیلات وزیراعظم احتساب کمیشن سامنڑے پیش کیتیاں ویسن۔ انہاں آکھیا جو تحریک انصاف دی 22 سالاں دی جدوجہد دا بنیادی مقصدملک اچ کرپٹ سیاستداناں اتے ملکی خزانے تے لٹ مار کرنڑ آلیاں دا احتساب کرنڑ اتے انہاں کوں انصاف دی کچہری اچ کھڑا کرنڑ ہے اتے ایہو سارے پاکستان دے عوام دا مطالبہ ہے۔انہاں آکھیا جو وزیراعظم دے ویژن مطابق وزارت اچ شاہانہ استعمال سانگے رکھی گی 219 کاراں کوں نیلام کیتا۔ انہاں آکھیا جو این ایچ اے 11 ارب روپے ودھ کمائے ہن جیندے کیتے وزارت وزیراعظم دے وژن مطابق اقدامات کیتے ہن۔
