آئی ایم ایف دی ملک اچ مہانگ دی شرح 13 فیصد تئیں ودھنڑ دی پیش گوئی،کرپشن دے خلاف مہم بئی تیز کرنڑ تے زور

اسلام آباد ۔ 04جولائی (اے پی پی)آئی ایم ایف ملک اچ مہانگ دی شرح 13 فیصد تئیں ودھنڑ دی پیش گوئی کریندے ہوئے ملک اچ کرپشن تے بیا قابو پاونڑ تے زور ڈتے۔پاکستان کوں قرض پروگرام دی منظوری دے نال ہی پاکستانی معیشت تے آئی ایم ایف رپورٹ وی جاری کرڈتی اے جیندے اچ مہانگ دی شرح 13 فیصدتئیں دی ہنڑ تک دی اچی ترین سطح تے پجنڑدی پیش گوئی کیتی اے اتےا ٓکھیے جو پاکستان کوں مالی ضروریات پوری کرنڑ کیتے 38 ارب ڈالردی لوڑھ پوسی جڈاں جو بئے عالمی مالیاتی اداریاں اتے ملکاں توں مالی مدد ملنڑ دا وی امکان اے۔ایں سانگے آئی ایم ایف ملک اچ کرپشن تے قابو پاونڑ کیتے کوششاں وی بیا تیز کرنڑدا آکھیے۔آئی ایم ایف جی ڈی پی اچ ٹیکساں دا حصہ 4 توں 5 فیصدودھاونڑ دا وی مطالبہ کیتے۔رپورٹ موجب وفاق اتے صوبیاں کوں مل تے ٹیکس آمدن ودھاونڑی ہوسی، بجلی اتے گیس قیمتاں دے تعین اچ سیاسی مداخلت مکاونڑی ہوسی جڈاں جو اجوکے مالی سال معاشی شرح نمو صرف 2.4 فیصد رہنڑ دا امکان اے تہوں پاکستان کوں سنگین معاشی چیلنجز دا سامنڑا اے۔