اقوام متحدہ ۔ 15 جولائی (اے پی پی) وزیراعظم عمران خان دی حکومت غربت مکاونڑ کیتے پرعزم اے ، اقوام متحدہ اچ پاکستان دی مستقل مندوب ملیحہ لودھی آکھیا جو اقتصادی مشکلات دے باوجود پاکستان پائیدار اقتصادی ترقی دے اہداف حاصل کرنڑ کیتے کم جاری رکھیسی جیں دا مقصد غربت ، عدم مساوات دا خاتمہ اتے موسمیاتی تغیرات دے ضیان تے قابو پاونڑ اے،ایں حوالے نال سارے شعبیں اچ ” جدت اتے اہداف دے حصول “ تے مبنی حکمت عملی تے کم کیتا ویندا پئے ۔ اقوام متحدہ اچ ہائی لیول پولیٹیکل پلیٹ فارم (ایچ ایل پی ایف) دے تحت والنٹری نیشنل ریونیو ( وی این آرز) 2019ءدے موضوع تے تریجھی عالمی ورکشاپ دے افتتاحی اجلاس نال خطاب کریندے ہوئیں ڈاکٹر ملیحہ لودھی آکھیا جو سیاسی عزم اتے ذمے واری دے تحت پاکستان پائیدار ترقی دے اہداف کوں اپنڑے قومی ترقی دے ایجنڈے اچ شامل کیتے ۔ اقوام متحدہ دے معاشی وسماجی امور دے محکمے دے زیر اہتمام منعقدہ ورکشاپ نال خطاب اچ انہاں آکھیا جو پاکستان 2018ءاچ قومی ایس ڈی جیز فریم ورک شروع کیتا ہئی تاں جو ملک اچ پائیدار ترقی دے اہداف حاصل کیتے ونجن۔ غربت مکاونڑ دے حوالے نال وزیراعظم عمران کان دی قیادت اچ کیتے گے اقدامات تے روشنی پیندے ہوئیں انہاں آکھیا جو غربت مکاونڑ کیتے احساس پروگرام شروع کیتا گے جیں دا مقصد سماجی تحفظ دے تحت انسانی وسائل دی ترقی اے۔
