لندن۔04جولائی(اے پی پی)انگلینڈ دی جیت پاکستان کیتے سیمی فائنل دا رستہ بیا اوکھا کر ڈتے کیوں جو میچ ہرنڑ توں بعدکیویزدے نوں میچ کھیڈ تے یارہاں پوائنٹس ہین اتے او پوائنٹس ٹیبل تے چوتھی پوزیشن تے ہے،ایندے نال ہی رنز ایوریج اچ کیویز کوںپاکستان تے برتری اے ، بنگلہ دیش توں جیت دے باوجود قومی ٹیم دااگلے مرحلے اچ ونجنڑ اوکھا ہی نئیں تقریبا ناممکن ڈسدے،کوئی معجزہ ہی سرفراز الیون کوں اگو تے گھن ونج سگدے۔پاکستان کوں بنگلہ دیش دے میچ اچ ناقابل یقین کارکردگی ڈکھاونڑی ہوسی جو اوندارن ریٹ نیزی لینڈ توں چنگاں تھی ونجے جیہڑاکرکٹ دے عشاریے اچ تقریبا ناممکن لگدے۔بھارت، آسٹریلیا اتے انگلینڈ پہلے ہی سیمی فائنل کیتے کوالیفائی کر چکین اتے چوتھی ٹیم دا فیصلہ اصولی طور تے پاکستان اتے بنگلہ دیش دے میچ توں بعد تھیسی۔جیکر پاکستان بنگلہ دیش کوں ہراوے تاں اوندے پوائنٹس وی یارہان تھی ویسن بھل اوکوں رن ریٹ چنگاں کرنڑ کیتے بنگلہ دیش کوں 316 رنز توں ہراونڑا پوسی ۔رن ریت موجب جیکر بنگلادیش دی ٹیم ٹاس جیت تے پہلے بیٹنگ کیتی تاں پاکستان دی ٹیم اوں ہی ویلھے ایونٹ توں باہرو تھی ویسی۔ایں صورت اچ ہار یا جیت دی کوئی اہمیت کائنا ہوسی۔پاکستان اتے بنگلہ دیش دا اے میچ 5 جولائی جمعہ کوں لارڈزاچ ڈینہہ ڈھائی وجے تھیسی۔
