اسلام آباد ۔ 11 جولائی (اے پی پی) پشاور موٹروے(ایم ون) براہمہ باہتر انٹرچینج تے حسن ابدال دے نیڑے سوات توں لاہور ویندی مسافراں دی بس خمیس کوں پُٹھی ڈھہہ پئی ۔حادثے دے نتیجے اچ 10بندے جاں بحق تے 23زخمی تھی گن ۔موٹر وے پولیس دے ترجمان دے مطابق بس نمبر ایل ای ایس149سوات توں لاہور ویندی پئی ہئی جو اسلام آباد۔پشاور موٹر وے(ایم ون) براہمہ باہتر انٹرچینیج تے حسن ابدال دے نیڑے تکھی رفتار تے مینھ پاروں تلکنڑ ہئی جیں پاروں موڑ تے ڈرائیور قابو نہ رکھ سگیا تے بس پٹھی ڈھہہ پئی جیں دے نتیجے اچ 10مسافر موقع تے جاں بحق تھی گن ۔ترجمان دے مطابق حادثے دے وقت بس اچ 49مسافر سوار ہن بس حادثے اچ جاں بحق تھیونڑ آلیں دیاں لاشاں تے زخمیاں کوں ہسپتال منتقل کرڈتا گے جڈاں جو بس ڈرائیور کوں گرفتار کرتے مقامی پولیس سٹیشن منتقل کرڈتا گے ۔موٹروے پولیس جاں بحق تھیونڑ آلے تے زخمیاں اچوں بہوں ساریں دی شناخت کرگھدی اے۔ جاں بحق تھیونڑ آلے10 لوکاں اچ ہک بال، ترائے3 تریمتاں 6 مرد شامل ہن ۔جاں بحق تھیونڑ آلیں اچوں سکینہ بی بی ، نورین ،کنزا دا تعلق لاہور توں اے جڈاں جو مرداں اچ خالد شہزاد سکنہ ننکانہ ،سیف الرحمان، نیاز اتے تاج دا تعلق سوات توں اے ۔اعجاز سکنہ نامعلوم اتے ڈو لوکاں دی شناخت کائنی تھی سگی ۔ حادثے دے نتیجے اچ ہک بندہ شدید زخمی اتے 22 معمولی زخمی تھن جنہاں کوں واہ جنرل ہسپتال تے ڈی ایچ کیو منتقل کر ڈتا گے ۔
