سپریم کورٹ جج ویڈیوکیس دی سماعت 23جولائی تئیں ملتوی کر ڈتی

اسلام آباد ۔ 16 جولائی (اے پی پی) سپریم کورٹ جج ویڈیودے حوالے نال کیس دی سماعت 23جولائی تئیں ملتوی کریندے ہوئیں واضح کیتے جو عدالت ترائی درخواست گزاراں دیاں تجویزاں سامنڑے آونڑ دے بعد اٹارنی جنرل توں وی انہاں دی صلاح گھنسی تے ایں معاملے اچ کیرھے کیرھے رستے کھلیے پن جیں دے بعد عدالت انہاں تجویز دی روشنی اچ کیس دا جائزہ گھن تے فیصلہ سنڑیسی۔ منگل کوں چیف جسٹس آصف سعید کھوسہ دی سربراہی اچ جسٹس شیخ عظمت سعید اتے جسٹس عمر عطاءبندیال تے مشتمل ترائے رکنی بینچ درخواست گزاراں اشتیاق مرزا،سہیل اختر اتے طارق اسد ولوں ویڈیو لیک دے حوالے نال دائر درخواستاں دی سماعت کیتی۔ ایں موقع تے درخواست گزاراں دے وکلاءاپنڑے اپنڑے دلائل پیش کریندے ہوئیں موقف اپنائے جو اے معاملہ اہم اے جیں دی وجہ توں عدالت دے وقار تے سوال چاتا گئے ،ایں معاملے کوں نظرانداز نہ کیتا ونجے ۔عدالت دی ہدایت تے فریقین تجویز ڈیون جو ایں معاملے دی انکوائری کیتے جج دی سربراہی اچ کمیشن بنڑایا ونجے جیرھا حقائق کوں سامنڑے گھن آوے ۔ چیف جسٹس آکھیا جو ایں معاملے دے ترائے پہلو ہن جیں اچ عدلیہ دا وقار، وڈیو دا سچا یا کوڑا ہوونڑ تے جج دا کنڈکٹ شامل ہن۔ عدالت درخواست گزاراں دے وکلاءدیاں تجویزاں سامنڑے آونڑ دے بعد اٹارنی جنرل توں وی صلاح گھننڑ چاہسی جیں دے بعد عدالت اپنڑاں فیصلہ سنڑیسی ۔عدالت مزید سماعت ملتوی کرڈتی ۔