لاہور توں کوئٹہ ونجنڑ آلی اکبر ایکسپریس ولہار سٹیشن صادق آبادتے پارسل ایکسپریس نال ٹکراگئی ، 9 بندے بحق ، 25 زخمی،وفاقی وزیر ریلوے شیخ رشید تحقیقاتی رپورٹ منگ گھدی

اسلام آباد ۔ 11 جولائی (اے پی پی) لاہور توں کوئٹہ ونجنڑ آلی اکبر ایکسپریس خمیس دی سویل چار وج تے 45 منٹ تے ولہار سٹیشن صادق آباد ٹریک تے پہلے توں موجود پارسل ایکسپریس نال ٹکرا گی۔ترجمان ریلوے دے مطابق حادثے اچ ہنڑ تئیں ضلعی انتظامیہ دے مطابق 9 بندے جاں بحق اتے تقریبا 25 زخمی تھی گن ۔ پاکستان ریلوے حادثے دی جاہ تے زخمیاں کیتے پیرامیڈیکل کیمپ قائم کرڈتے ۔ معمولی زخمی مسافراں کوں وختی طبی امداد موقع تے ڈتی ویندی پئی اے ۔ ریلوے انتظامیہ ضلعی انتظامیہ دے رلے فوری ریلیف اپریشن شروع کرڈتے ۔ ریلوے ہیڈکوارٹرز لاہور توں جی ایم ریلوے اتے بئی افسراں دی ٹیم براستہ روڈ حادثے دی جاہ تے روانہ تھی گئی اے جڈاں جو سکھر ڈویژنل افسر موقع تے ریلیف اپریشن اچ حصہ گھندے پن ۔ پاکستان ریلوے دی اپ اتے ڈاون ٹریفک معمول دے مطابق چلدی پئی اے ۔ وفاقی وزیر ریلوے شیخ رشید احمد حادثے دی تحقیقاتی رپورٹ طلب منگ گھدی اے ۔