اسلام آباد ۔ 15 جولائی (اے پی پی) وزیراعظم عمران خان ’نیا پاکستان ہاﺅسنگ منصوبے سانگے رجسٹریشن دا منڈھ بدھ ڈتے۔ایں نال پورے ملک اچوں تنخواہ دار اتے غریب طبقے سانگے گھر بنڑاونڑ بارے وسائل اتے گھراں دی طلب بارے معلومات مل سگسن جئیں دے بعد اے سکیماں شروع کیتی ویسین۔سنوار کوں اسلام آباد اچ نیا پاکستان ہاﺅسنگ و ڈویلپمنٹ اتھارٹی دے تحت آن لائن رجسٹریشن دی افتتاحی تقریب نال خطاب کریندیں ہوئیں وزیراعظم عمران خان آکھیا جوکجھ وجہ پاروں اساڈا بینکنگ دا نظام گھر بنڑاونڑ سانگے فنانسنگ کریندا پیا ہئی ،ایں صورتحال اچ صرف او لوک گھر بنڑا سگدے ہن جنہاں دے نقدی رقم ہئی ۔ایں بارے نواں آرڈیننس گھدی آندوں جئیں دی کابینہ منظوری ڈیسی۔ایں آرڈیننس نال گھر بنڑاونڑ سانگے فنانسنگ دا عمل سوکھا تھی ویسی۔انہاں آکھیا جو ایں ویلھے پاکستان اچ ہک کروڑ توں ودھ نویں گھراں دی لوڑھ اے۔نیا پاکستان ہاﺅسنگ منصوبے دے تحت اساں بے گھراں سانگے گھر بنڑاونڑن۔انہاں آکھیا جو نیا پاکستان ہاﺅسنگ اتھارٹی اچ ون ونڈو آپریشن نال عوام کوں سہولتاں ڈتی ویسی۔وزیراعظم آکھیا جو اے گالھ ساریاں کوں پتہ اے جو ایں سکیم نال چالہی صنعتاں کوں براہ راست فائدہ تھیسی۔انہاں آکھیا جو رجسٹریشن دا عمل ترائے مہینے جاری رہسی۔
