اسلام آباد ۔ 16 جولائی (اے پی پی) وزیر خارجہ شاہ محمود قریشی نال منگل کوں وزارت خارجہ اچ امریکہ پاکستان بزنس کونسل دے اعلیٰ سطح دے وفد ملاقات کیتی۔ وفد دی قیادت چیئرمین (پاک امریکہ بزنس کونسل) ڈاکٹر محمود خان کیتی جڈاں جو وفد اچ وڈی امریکی کمپنیاں دے ڈو درجن توں ودھ چیف ایگزیکٹوز شامل ہن۔ ملاقات اچ ڈو طرفہ تجارت، اقتصادی تعاون اتے سرمایہ کاری بارے گالھ مہاڑ کیتی گی ۔ایں موقع تے گالھ مہاڑ کریندے ہوئیں وزیرخارجہ آکھیا جوپاک امریکہ بزنس کونسل ڈوہائیں ملکاں وچال مختلف شعبیں اچ تعاون دے نویں رستے گولنڑ سانگے مدد کر سگدی ہے۔انہاں آکھیا جو زراعت اتے خوراک دے شعبیں اچ سرمایہ کاری دے ودھ سارے مواقع موجود ہن۔ شاہ محمود قریشی آکھیا جو پاکستان اتے امریکہ وچال تعلقات پرانڑے اتے کثیرالجہتی ہن۔انہاں آکھیا جو وزیر اعظم عمران خان صدر ٹرمپ دی دعوت تے دورہ امریکہ تے ویندے پن، اساں چاہندوں جو ایں دورے توں فائدہ چیندے ہوئیں ڈوہائیں ملکاں وچال اقتصادی سانجھداری ودھاونڑ سانگے،اہم امریکی کاروباری شخصیات اتے کمپنیاں نال ملاقات کر تے انہاںکوں پاکستان اچ سرمایہ کاری دے میسر مواقعاں اتے جنوبی ایشیا دی مارکیٹ بارے ڈسا سگوں ۔ پاک امریکہ بزنس کونسل دے ارکاناں وزیر خارجہ کوں ڈوہائیں ملکاں وچال اقتصادی سانجھداری ودھاونڑ سانگے ہر ممکن تعاون دا یقین ڈیوایا۔
