اسلام آباد ۔ 31 جولائی (اے پی پی)قومی احتساب بیورو کے ایگزیکٹو بورڈ دااجلاس چیئرمین جسٹس جاوید اقبال دی صدارت اچ نیب ہیڈکوارٹرز اسلام آباد اچ تھیا۔ اجلاس ا چ ڈپٹی چیئرمین نیب، پراسیکیوٹر جنرل اکاﺅنٹیبلٹی، ڈی جی آپریشن ڈی جی راولپنڈی اتے بئے سینئر افسراں شرکت کیتی۔ نیب دی ایہ پرانڑیں پالیسی ہے جو قومی احتساب بیورو دے ایگزیکٹو بورڈ اجلاس دی تفصیل بارے عوام کوں ڈسیندے اتے ایہ طریقہ گزریل کئی سالاں توں چلدا پئے،جیندا مقصد کہیں نال زیادتی یا کہیںدا دل ترونڑ کائنی ۔ ایگزیکٹو بورڈ دے اجلاس اچ سید اکرام اللہ شاہ سابق ایکسیئن آپریشنز ٹیسکو فاٹا سرکل پشاور دے خلاف کرپشن ریفرنس دائر کرنڑ دی منظوری ڈتی گی۔ ملزم تے مبینہ طورتے اختیارات دا ناجائز استعمال کریندے ہوئیں حیات آباد اچ مختلف سٹیل ملاں کوں بجلی دے غیرقنونی کنکشن ڈیونڑ داالزام ہے۔جیندی وجہ نال قومی خزانے کوں 49.07 ملین روپے دا نقصان پجیا۔ اجلاس اچ9 انکوائریاں دی منظوری ڈتی ،جیندے اچ خورشید شاہ رکن قومی اسمبلی، سردار مہتاب احمد خان عباسی سابق گورنر خیبرپختونخوا اتے بئے بندیاں اچ خالد شیر دل سابق سیکرٹری انڈسٹریز پنجاب ، محمد اقبال خان، ایس ڈی ایف اوفاریسٹ سب ڈویژن مینگورہ، سوات اتے محکمہ اوقاف خیبرپختونخوا دے اہلکاراں تے افسراں ،جڈاں جو محکمہ تعلیم کوئٹہ دی انتظامیہ اتے بئے پرووینشل ہائی وےز ڈویلپمنٹ ڈویژن خیرپور دے اہلکاراں تے افسراں، منور نذیر عباسی سابق چیف ایگزیکٹو آفیسر سکھر الیکٹرک پاور کنسٹرکشن کمپنی، پبلک ہیلتھ ڈویژن پنجاب اتے پنجاب ہائی ویز ڈیپارٹمنٹ دے خلاف انکوائریاں دی منظوری ڈتی گی۔ اجلاس اچ 4 انوسٹی گیشناں دی منظوری ڈتی گئی ،جیندے اچ آئل اینڈ گیس ڈویلپمنٹ کمپنی لمیٹڈ (او جی ڈی سی ایل) دی انتظامیہ، پرائیویٹائزیشن کمیشن دے سرکاری عہدیداراں، ٹرسٹ انویسٹمنٹ بینک، وزارت اطلاعات تے نشریات دے افسراں تے اہلکاراں، گلیات ڈویلپمنٹ اتھارٹی خیبرپختونخوا دے اہلکاراںدے خلاف انوسٹی گیشناں دی منظوری شامل ہے۔ چیئرمین نیب جسٹس جاوید اقبال آکھیا جو کرپشن ہک ناسور ہے جیرھا جو ملکی ترقی تے خوشحالی دی راہ اچ سبھ توں وڈی رکاوٹ ہے۔ نیب کرپٹ عناصر ،اشتہاری اتے مفرو ر ملزماں دے مقدمات کوں قنون مطابق انجام تئیں پجاونڑ سانگے سارے وسائل استعمال کریندا پئے،کیونجو “نیب دا ایمان -کرپشن فری پاکستان “ہے ۔
