مانچسٹر ۔ 10 جولائی (اے پی پی)باہرویں واں ورلڈ کپ، نیوزی لینڈ بھارت دا غرور مٹی اچ روہڑ ڈتے ۔کیویز ٹائٹل فیورٹ بھارت کوں سیمی فائنل اچ دلچسپ مقابلے دے بعد 18 سکور توں ہرا تے مسلسل ڈوجھی واری فائنل کھیدنڑ دا اعزاز وی حاصل کر گھدے۔کیویز پہلے کھیڈے ہوئیں مقررہ اوورز اچ 8 وکٹاں تے 239 رنز بنڑائے، جواب اچ بھارتی ٹیم چھیکڑی اوور دی تریجھی گیند تے 221 سکور بنڑا تے آﺅٹ تھی گی، کیویز باولرز تباہ کن باﺅلنگ کر تے بھارتی ٹیم دی مضبوط بیٹنگ لائن اپ ایسی تیسی پھیر ڈتی، جدیجا دے77 اتے دھونی دی ففٹی وی ٹیم کوں ہار توں نہ بچا سگی، ہنری 3، بولٹ اتے سینٹنر 2، 2 وکٹاں گھدیاں ، ہنری مین آف دی میچ بنڑے۔ بھارتی کرکٹ ٹیم انگلینڈ اچ جاری ورلڈ کپ کرکٹ ٹورنامنٹ اچ اپنڑے وچھائے ہوئے جال اچ پھس گی اتے سیمی فائنل اچ نیوزی لینڈ دے ہتھوں ہر گی۔ انگلینڈ اچ جاری ورلڈ کپ ٹورنامنٹ اچ بھارتی ٹیم پاکستانی ٹیم کوں عالمی ٹائٹل دی دوڑ توں باہر کرنڑ سانگے سازش کیتی، بھارتی ٹیم جیرھی جو ایونٹ اچ ناقابل شکست ہائی لیکن پاکستان کوں ٹائٹل دی دوڑ توں باہر کرنڑ سانگے انہاں جانڑ بوجھ تے انگلینڈ کو ںاپنڑے خلاف میچ جتوایا، گرین شرٹس دے باہر ہونڑ دی وجہ نال انگلینڈ اتے نیوزی لینڈ دی ٹیماں سیمی فائنل اچ پجیاں۔ سیمی فائنل اچ بھارت دا میچ کیویز نال تھیا اتے نیوزی لینڈ انڈیا دی امیداں تے پانڑیں پھیر ڈتااتے اٹھاراںسکور توںہرا تے ورلڈ کپ دی دوڑ توں باہر کر ڈتے۔
