اسلام آباد ۔ 17 اگست (اے پی پی) صدر مملکت اجوکی پاک بھارت کشیدگی اچ پاک بحریہ دے افسران سیلرزدی دلیری سانگے ملٹری اعزازات و اسناد دی منظوری ڈے ڈتی اے۔پاکستان نیوی موجب پلوامہ حملے دے بعد بھارتی بحریہ اپنڑیان آبدوزاں مادر وطن دی سمندری حدوداچ بھیجنڑ دی کوشش کیتی ہئی جیکوں پاک بحریہ دے پی تھری سی اورین جہاز دے آفیسرز لیفٹیننٹ کمانڈر حمیر افتخار اتے لیفٹیننٹ کمانڈر خرم داود ویلھے تے پتا لاءتے ناکام بنڑا ڈتا ہا۔بہادری اتے شجاعت دے ایں اعلی اقدام دے اعتراف اچ کیپٹن سیدایلیا حسن پاکستان نیوی اتے لیفٹیننٹ کمانڈر حمیر افتخار کوں ستارہ بسالت جڈاں جو لیفٹیننٹ کمانڈر خرم کوں تمغہ بسالت ڈیونڑ دی منظوری ڈتی گئی اے۔صدر مملکت پاک بحریہ دے افسران، سی پی اوز/سیلرز اتے سیویلن کیتے وی عسکری اتے سول اعزازات منظور کیتن جیندے اچ ترائے ہلالِ امتیاز (ملٹری)، 02 ستارہ بسالت، 08 تمغہ بسالت، 14 ستارہ امتیاز (ملٹری)اتے 13 آفیسرز کوں تمغہ امتیاز (ملٹری)ڈتا ویسی۔ پاک بحریہ دے ایم سی پی اوز، سی پی اوز اتے سیلرز کوں 04 امتیازی اسناد اتے 98 تمغہ خدمت وی دتے ویسن۔ چیف آف نیول اسٹاف ولوں 66 افسران اتے سیلرز کوں چنگی کارکردگی تے لیٹر آف کمینڈیشن وی ڈتے ویسن۔