اسلام آباد ۔ 20 اگست (اے پی پی) وفاقی کابینہ دا اجلاس منگل کوں وزیراعظم عمران خان دی صدارت اچ تھیا۔اجلاس توں بعد اطلاعات تے نشریات سانگے وزیراعظم دی معاون خصوصی ڈاکٹر فردوس عاشق اعوان وفاقی کابینہ دے اجلاس بارے میڈیا کوںبریفنگ ڈتی۔انہاں ڈسایا جو پاکستان تحریک انصاف دی حکومت اقتدار سانبھنڑ دے بعد ملک دی ڈھاندی ہوئی معیشت کوں سنبھالے۔انہاں آکھیا جوگزریل سال استحکام پاکستان دا سال ہا جڈاں جو جاری سال تعمیر پاکستان دا سال ہو سی۔فردوس عاشق اعوان آکھیا جو کشمیر پاکستان دادفاعی حصار ہے، میڈیا بھارتی بربریت دے خلاف تسلسل نال گالھ کرنڑ دا سلسلہ جاری رکھے۔انہاں آکھیا جوکابینہ مظلوم کشمیریاں دی جنگ عالمی فورمز تے چنگے طریقے نال لڑن دا فیصلہ کیتے۔ انہاں ڈسایا جووزیراعظم عمران خان کابینہ کوں امریکی صدر ڈونلڈ ٹرمپ دے نال کشمیر توں متعلق تھیونڑ آلی اپنڑیں گالھ مہاڑ بارے ڈسائے۔انہاں آکھیا جودفاعی پالیسیاں دے تسلسل کیتے آرمی چیف جنرل قمر جاوید باجوہ دی مدت ملازمت اچ توسیع دافیصلہ کیتا گئے ۔فردوس عاشق اعوان آکھیا جو وفاقی کابینہ پاک ترک سٹرٹیجک اکنامک فریم ورک، گھٹ لاگت دے مکاناں دے منصوبے کیتے 5 ارب روپے قرضہ ڈیونڑ،نیشنل انفارمیشن ٹیکنالوجی بورڈ، گھریلو تشدد دے تحفظ اتے اینکوںروکنڑ دے بل دی منظوری وی ڈے چھوڑی ہے۔معاون خصوصی آکھیا جو کابینہ اجلاس اچ کرسچین میرج اتے طلاق بل 2019ءدی اصولی منظوری وی ڈتی گی ۔انہاں ڈسایا جو وزیر مواصلات کابینہ کوں اپنڑیں وزارت دی کارکردگی بارے تفصیلی بریفنگ ڈتی ہے۔ معاون خصوصی ڈسایا جو وزیر مملکت موسمیاتی تبدیلی زرتاج گل پہاڑی علاقیاں اچ ماحولیاتی تحفظ کیتے شمسی توانائی نال چلنڑ آلے سولر چولہے متعارف کراونڑ دی صلاح ڈتی،جیں تے وزیراعظم متعلقہ وزارت کوں ایں مشورے کوں عملی شکل ڈیونڑ دی ہدایت کیتی۔انہاں آکھیا جووزیر توانائی کابینہ کوں گیس اتے بجلی دے شعبے اچ ای میٹر لاونڑ بارے ڈسایا۔ وزیر امور کشمیر سیاحت دے ودھارے توں متعلق اقدامات بارے ڈسایا ۔ وفاقی وزیر بین الصوبائی رابطہ ڈاکٹر فہمیدہ مرزا کابینہ کوں کھیڈاں دے فروغ سانگے کیتے گئے اقدامات بارے ڈسایا۔ انہاں آکھیا جو وزیراعظم باہرلے ملکاں دی سرمایہ کاری سانگے ون ونڈو آپریشن دی ہدایت کیتی ہے۔ ڈاکٹر فردوس عاشق اعوان ڈسایا جو کابینہ پاک ترک سٹرٹیجک اکنامک فریم ورک دی وی منظوری ڈتی ہے۔ فریم ورک مطابق نو ورکنگ گروپس بنڑائے گن جیرھے جو 71 نکات تے پیش رفت دا لائحہ عمل تیار کریسن۔انہاں آکھیا جو سی پیک تحت وسط ایشیائی ریاستاں اتے ترکی د ی مدد نال یورپ دے نال تجارت اچ ودھارا کیتا ویسی ۔انہاں آکھیا جووزیراعظم ولوںکابینہ دے اجلاس اچ ہر وزارت کوںواری اپنڑیں کارکردگی پیش کرنڑ دی ہدایت دی روشنی اچ وزیر مواصلات کابینہ کو ںاپنڑیں وزارت دی کارکردگی بارے بریفنگ ڈتی۔ انہاں ڈسایا جووزارت مواصلات 7 ارب روپے دی ریکوری کیتی، وزارت مواصلات این ایچ اے دی آمدن اچ 52 فیصد ودھارا کیتے، غیر قنونی قبضہ کرنڑ آلیاں توں چار ہزار توں ودھ زمیناں چھوڑئیاں گن۔ وزیراعظم وزیر مواصلات دے جذبے اتے اقدامات دی تعریف کیتی۔ انہاں آکھیا جو کابینہ اجلاس اچ وزیراعظم مسئلہ کشمیر کوں اجاگر کرنڑ کیتے سمندر پار پاکستانیاں دے کردار دی وی تعریف کیتی ۔ ہک سوال دے جواب اچ معاون خصوصی آکھیا جو دفاعی پالیسیاں دے تسلسل کیتے آرمی چیف جنرل قمر جاوید باجوہ دی مدت ملازمت اچ توسیع دا فیصلہ کیتا گئے۔انہاں آکھیاجو افغان امن دے عمل اچ وی جنرل قمر جاوید باجوہ دا اہم کردار ہے۔ انہاں آکھیا جو جڈاں کوئی قوم حالت جنگ اچ ہوئے تاں سپہ سالار نی بدلے ویندے بلکہ انہاں دی خدمات کوں جاری رکھیا ویندے۔
