جدہ۔31اگست(اے پی پی) اسلامی تعاون دی تنظیم او آئی سی بھارت توں مسئلہ کشمیر کوں اقوام متحدہ دی قرارداداں دے تحت حل کرنڑ اتے کرفیو چاءتے مواصلاتی نظام دی فوری بحالی دا مطالبہ کریندے ہوئے کشمیری عوام نال اظہار یکجہتی کیتے۔ او آئی سی موجب کشمیر پاکستان اتے بھارت وچال ہک عالمی سطح تے منیا ہویا ڈو طرفہ مسئلہ اے جیندے تے بھارت یک طرفہ طورتے کوئی فیصلہ نئیں کر سگدا،بھارت ولوں آرٹیکل 370 اتے 35-اے کوں منسوخ کرتے کشمیر دی خصوصی حیثیت مکاونڑ دافیصلہ عالمی قوانین دی کھلی خلاف ورزی اے۔ او آئی سی مطالبہ کیتے جو بھارت مقبوضہ وادی اچ 25 ڈینہہ توں جاری مسلسل کرفیو مکا تے مواصلاتی نظام بحال کرے۔او آئی سی زور ڈتے جو بھارت اقوام متحدہ دیاں قرارداں دے تحت کشمیر دی خصوصی حیثیت منیندے ہوئے مسئلہ کشمیر دا پائیدار حل کڈھے۔
