اسلام آباد ۔ 22 اگست (اے پی پی) وزیراعظم عمران خان بھارت کو ں بہوں واری مذاکرات دی پیشکش دے باوجود کوئی مثبت جواب نہ ملنڑتے افسوس دا اظہار کریندے ہوئیں آکھیے جو او بھارتی ہم منصب نریندر مودی نال گال نی کرنڑ چاہندے جیرھے جو مقبوضہ کشمیر دے مسلم اکثریتی خطے دے آبادیاتی ہیئت کوں بدالنڑ چاہندن ،ڈو ہمسائے جوہری ملکاں وچال عسکری کشیدگی اچ ودھارے دا ڈر اے ، اقوام متحدہ دے امن دستے تے مبصرین کوں بھارتی مقبوضہ کشمیر دا دورہ کرنڑ دی اجازت ڈتی ونجے ۔اے گال انہاں امریکی اخبار نیو یارک ٹائمز کوں ہک انٹرویو ڈیندے ہوئیں آکھی اے ۔ وزیراعظم آکھیے جو مقبوضہ کشمیر اچ 5 اگست دے بھارتی کریک ڈاﺅن توں پہلے اتے بعد اچ اساں مذاکرات دی بہوں واری پیشکش کیتی اے لیکن ایندا مثبت جواب کائنی ڈتا گیا ،ہنڑ بھارت نال گال کرنڑ دا کوئی فائدہ کائنی ، میڈا مطلب اے جو میں ایں بارے بہوں واری گال کرنڑ دی کوشش کر گھدی اے ،جڈاں میں مڑ تے ڈیکھداں تاں اساں امن تے گال کرنڑ کیتے ہر ممکن کاوش کیتی لیکن بدقسمتی نال بھارتی حکومت اساڈیاں انہاں کوششاں توں صرف تسکین حاصل کریندی رہی اے اساں ایندے توں ودھ کجھ نی کرسگدے ۔ وزیراعظم مقبوضہ کشمیر دی صورتحال تے مودی سرکار کوں تنقید دا نشانہ بنڑیندے ہوئیں آکھیے جو بھارت مقبوضة جوں تے کشمیر اچ ممکنہ بد امنی کوں روکنڑ کیتے بھارتی نفری تعینات کیتی اے تے پورے علاقے اچ مواصلات دا پورا نظام بند کرڈتا گے ۔انہاں مودی کوں فاشسٹ اتے ہندو بالادستی دی ذہنیت دا حامل قرار ڈتا جیرھا جو کشمیر دی مسلم اکثریتی آبادی کوں ختم کرتے ہندو اکثریتی آبادی اچ بدالنڑ چاہندے ۔انہاں آکھیے ساریں توں اہم گال اے ہے جو 80لکھ انساناں دی زندگی خطرے اچ اے ۔ اساں فکر مند ہوں جو انہاں دا قتل عام تے نسل کشی تھیونڑ آلی اے ۔وزیراعظم اے انٹر یو ایجھے وقت تے ڈتے جڈاں ہک ڈینھ پہلے امریکی صدر ڈونلڈ ٹرمپ نال ٹیلی فون تے گال مہاڑ اچ انہاں کوں پاکستان تے باھرت وچال کشمیر دے مسئلے تے بہوں کشیدہ صورت حال دا ڈسائے ۔وزیراعظم انٹرویو اچ ایں گال تے تشویش دا اظہار کیتے جو بھارت کشمیر اچ نقلی اپریشن کرسگدے تاں جو پاکستان دے خلاف فوجی کاروائی دا جواز پیدا کرے ،جیں تے پاکستان جواب ڈیونڑ تے مجبور تھیسی۔انہاں آکھیے ڈو جوہری ملک آمنڑے سامنڑے آسن تاں کجھ تھی سگدے ۔اساں کیتے فکر دی گال اے جو ایندے نال ڈو جوہری ملکاں وچال کشیدگی ودھ ویسی، دنیا کوں سمجھ ہوونڑیں چاہیدی اے جو اے صورت حال خطر ناک ہوسی ۔نیو یارک ٹائمز آکھیے جو عمران خان وزارت عظمیٰ دا عہدہ سنبھالنڑ دے فوراً بعد کشمیر سمیت ڈوہیں ملکاں وچال سارے مسئلیں دے حؒ کیتے بھارت دے نال مذاکرات دی بحالی کیتے کوششاں کیتیاں ۔
