ملتان ۔22اگست(اے پی پی)ایڈیشنل سیشن جج ماڈل عدالت ملتان عمران شفیع خان معروف ماڈل قندیل بلوچ دے والدین ولوں قتل اچ ملوث قندیل بلوچ دے بھراواں کوں معاف کرنڑ دی درخواست مستردکرڈتی۔درخواست اچ مقدمہ دے مدعی قندیل بلوچ دے والد عظیم بلوچ آکھیا جو میڈے اتے میڈی زال انور دے بیانات قلمبند تھی چکین،پولیس میڈے پتراں وسیم اتے اسلم شاہین دے خلاف مقدمہ درج کرتے کوڑی کہانی گھڑی اے،مقدمہ اچ غیرت دے ناں تے قتل دی دفعہ وی پاءڈتی ہئی، اساں پتراں کوں معاف کر ڈتے، انہاں کوں بری کیتا ونجے۔استغاثہ تحریری جواب ڈتے جو مقدمے اچ ہنڑ تئیں 19شہادتاں لکھیجنڑتوں بعد راضی نامہ دی درخواست کیس کوں متاثر کرنڑ دے مترادف ہوسی ،تعزیرات پاکستان اچ ترمیمی دفعہ 311دے نفاذدے بعد غیرت دے ناں تے قتل دے مقدمے اچ صلح نئیں تھی سگدی، تہوں صلح ممکن کائنی،سارے گواہان دے بیان قلمبند تھیونڑ دے بعد فیصلہ کیتا ویسی۔
