اسلام آباد ۔ 11 ستمبر (اے پی پی) وزیر خارجہ شاہ محمود قریشی آکھیے جو بھارت جموں و کشمیر دی خصوصی حیثیت مکاونڑ دے بعد اتھاں آبادیاتی تناسب وی بد لنڑ چاہندے،اساں امن دی خواہش رکھیندوں، لیکن جوہری ملک بھارت دی شر انگیزیاں دا سامنڑاں ہے ۔علاقائی سلامتی دے درپیش چیلنجز دے باوجود پاکستان کثیر الجہتی سوچ تے عمل کریندا پئے ۔بدھ کوں جینوا اچ بین الاقوامی شہرت رکھنڑ آلے تھنک ٹینک جنیوا سینٹر فار سیکورٹی پالیسی اچ ”اساڈی خارجہ پالیسی اتے علاقائی سلامتی دیاں کوششاں “ دے موضوع تے تھیونڑ آلے سیمینار توں خطاب کریندے ہوئیں وزیر خارجہ آکھیا جو پاکستان دی خارجہ پالیسی بنڑاونڑ اچ اساڈی وکھری جغرافیائی حیثیت دا وڈا عمل دخل ہے، اگرچہ پاکستان خطے اچ امن دی خواہش رکھیندے لیکن مشرق اچ اساکوں توسیع پسندانہ عزائم رکھنڑ آلے ایٹمی ملک بھارت دی شر انگیزیاں دا سامنڑاں کرنڑ پوندے۔انہاں آکھیا جو انسانی حقوق کونسل اجلاس اچ شرکت دا مقصد دنیا کوں بھارت ولوں مقبوضہ جموں و کشمیر اچ جاری انسانی حقوق دی سنگین خلاف ورزیاں بارے ڈساونڑ ہے اتے ا یہ صرف اساں نی آکھدے پئے بلکہ ایں ویلھے یورپی پارلیمنٹ، برطانوی پارلیمنٹ، او آئی سی، ایمنسٹی انٹرنیشنل ، ہیومن رائٹس واچ، واشنگٹن پوسٹ اتے نیویارک ٹائمز ورگے ادارے انہاں مظالم تے گالھ کریندے پن۔