اسلام آباد ۔ 15 ستمبر (اے پی پی)وزیراعظم دے مشیربرائے خزانہ واقتصادی امورڈاکٹرعبدالحفیظ شیخ آکھیے جو حکومت دا محور پاکستان دے عوام ہین، معیشت دی چنگائی اتے ایکوں دستاویزی بنڑاونڑ کیتے پرعزم ہیں، امید اے جو ایں سال ودھوتری دی شرح 3فیصد توں ودھ ہوسی۔پچھلے ڈو مہینے حسابات جاریہ دے خسارے اچ 73فیصد کمی تھئی اے،ٹیکس وصولیاں اچ پہلے توں15فیصد اتے ان لینڈ ٹیکس ریونیو دی مداچ 38فیصد ودھارا تھئے، نان ٹیکس ریونیو دی مد اچ ہک ہزارارب روپے ملنڑ دی توقع اے،ہر فیصلہ عوام دی بہتری دے مطابق کیتا ویندا پئے،حکومتی اقدامات دے چنگے نتیجے آونڑ لگ گین۔اے گالھ انہاں اسلام آباد اچ چیئرمین ایف بی آر سید شبر زیدی اتے سیکرٹری خزانہ نوید کامران بلوچ دے رلے پریس کانفرنس کریندے ا ٓکھی۔ انہاں آکھیا جوحکومت ٹیکس ادائیگی کیتے سوکھ ڈیسی بھل جیندے تے ٹیکس لازم اے انہاں کوں ضرور ڈیونڑا چاہیدے، ایندے اچ کوئی سودے بازی نہ تھیسی۔انہاں آکھیے جو ساڈا مقصد معیشت تکڑی کرنڑ کیتے زرمبادلہ دے ذخائر ودھاونڑ اتے اقتصادی اعشاریے چنگے کرنڑ اے،کفایت شعاری دے تحت حکومتی اخراجات گھٹائن،ریونیو ودھاونڑدے اقدامات کیتے گین،کوشش اے ودھ توں ودھ ٹیکس کٹھا کیتا ونجے اتے بیرونی خسارہ گھٹایا ونجے۔پچھلے ڈو مہینے اچ حکومت حسابات جاریہ دا خسارہ 19.5ارب ڈالرتوں گھٹا تے 13ارب ڈالرکیتے،برآمدات وھین اتے درآمدات گھٹین،ٹیکس وصولیاں دی شرح اچ 15فیصد اضافہ ریکارڈتھئے،انہان ڈو مہینے جولائی اگست اچ 580ارب روپے اگڑیجن ، ٹیکس فائلرز 19لکھ توں ودھ تے 25لکھ تھی گین،ٹیکس ریفنڈ دا کوئی کیس نئیں بچیا،برآمد کنندگان دی سہولت کیتے ریفنڈبارے نظام 23اگست توں کم کریندا پئے۔خسارے دا شکار اداریاں دی نجکاری تیز کرڈتی گئی اے،20اداریاں دی ری سٹرکچرنگ تھیندی پئی اے، پیداواریت ودھاونڑ تے توجہ اے،سیلولر لائسنس دی مد اچ موبائل کمپنیاں توں 200ارب روپے دا ریونیو اگڑیسی، آر ایل این جی پلانٹس دی نجکاری جنوری اچ تھیسی جیندے نال 300ارب روپے ملسن۔انہاں آکھیے جو عوام تسلی رکھیں جو حکومت جیہرے وی اقدامات کریندی پئی اے سارے انہاں دے فیدے کیتے ہین بھل مہانگ قابو کرنڑ ہک چیلنج اے جیندے کیتے جامع اقدامات کیتے ویندے پین۔
