اسلام آباد ۔ 6 ستمبر (اے پی پی) بین الاقوامی سطح تے متبادل ذرائع نال بجلی دی پیداوار دے حصول کیتے کیتی ونجنڑ آلی سرمایہ کاری اجوکے سال دے چھیکڑ تئیں 2.6 کھرب ڈالر تئیں پج ویسی ۔اقوام متحدہ دی رپورٹ دے مطابق پوری دنیا اچ متبادل ذرائع توں بجلی پیدا کرنڑ دی شرح اچ گزریل ڈاہ سال دے دوران ودھارا تھئے۔ پاکستان سمیت پوری دنیا دے ملک سجھ ‘ ہوا ‘ جیو تھرمل اتے بائیو ماس توں توانائی دے حصول تے خصوصی توجہ ڈیندے پن تاں جو صارفین کوں شفاف تے سستی توانائی دی فراہمی کوں یقینی بنڑایا ونج سگے ۔ یو این انوائرمنٹ پروگرام دے ایگزیکٹو ڈائریکٹر انگر اینڈرسن آکھیے جو سال 2009ءدے چھیکڑ تئیں عالمی سطح تے متبادل ذرائع توں 414 گیگا واٹ بجلی پیدا کیتی ویندی پئی ہئی جیرھی جو سال 2019ءدے اختتام تئیں 1650 گیگا واٹ تئیں ودھ ویسی ۔ ایں وقت پوری دنیا اچ پیدا کیتی ونجنڑ آلی 12.9 فیصد بجلی متبادل ذرائع توں حاصل کیتی ویندی پئی اے ۔ اقوام متحدہ دی رپورٹ دے مطابق متبادل ذرائع توں پیدا کیتی ونجنڑ آلی بجلی دی قیمت اچ گزریل ڈاہ سال دے دوران کمی واقع تھئی اے ۔
